လွဲမှားနေသော မာန

တခါက လူတယောက်ဟာ သူရဲ့ နွားတွေကို မြက်ကျွေးဖို့အတွက် မြက်ရိတ်ရန် ထွက်လာခဲ့ပါတယ်။

"အင်း ငါ့ရွာဖက်မှာတော့ မြက်က ရှားသွားပြီ ဟိုဖက်ရွာ သွားရိတ်မှပဲ"

ဤသို့တွေးကာ တဖက်ရွာသို့ မြက်သွားရိတ် လေသည်။ တမနက် ရိတ်လိုက်ပြီး လုံလောက်သော မြက်များ ရရှိသဖြင့် မြက်ထုံးကြီး ထုံးလေရာ မြက်ထုံးမှာ ကြီးလွန်းသဖြင့် ပုခုံးထမ်း မနိုင်အောင် ဖြစ်နေတော့သည်။

ထိုအခါ ထမ်းပိုးဖြင့် လျှိုထမ်းရန် ဝါးလုံးပိုင်း ရှာရပြန်သည်။ ဝါးလုံးရသောအခါ ရှေ့နောက်လျှို၍ ထမ်းရန်လည်း မြက်ကတထုံးတည်း ဖြစ်နေသဖြင့် ရှေ့တွင် မြက်ထုံးနှင့် အလေးချိန် တူညီသည့် ကျောက်တုံးတတုံးကို အစားထိုး ထမ်းခဲ့ရလေသည်။

လမ်းခုလတ် ရောက်သောအခါ လူတဦးနှင့် တွေ့လေရာ ထိုလူက ဤသို့ အကြံပေးပါသည်။

"ကိုယ့်ဆရာက တော်တော် အပင်ပန်း ရှာတာကိုး။ မြက်ထုံးကို တဝက်စီခွဲပြီး ရှေ့နဲ့နောက် ထမ်းပိုးလျှိုထမ်းလည်း ရတာဘဲဗျာ"

"အဲ ဟုတ်သားဘဲ မတွေးမိလိုက်တာဗျာ"

အဲဒါနဲ့ဘဲ ထိုလူ အကြံပေးသည့်အတိုင်း မြက်ထုံးကို တဝက်စီခွဲပြီး ရှေ့နောက် ထမ်းပိုးလျှို၍ ထမ်းလိုက်ပါတော့သည်။

ထိုသို့လာခဲ့ပြီး ခရီးအတန်ငယ် ပေါက်ခါမှ ဤသို့ တွေးမိပြန်လေသည်။ "ထမ်းရတာတော့ အဆင်ပြေပါရဲ့။ ဒါနဲ့ ငါ့ကို ဒီအကြံ ပေးသွားတဲ့လူက ဘယ်သူပါလိမ့်"

ထိုသို့ တွေးမိပြီး သိချင်လာပြန်သဖြင့် အစောပိုင်းက တွေ့ခဲ့သူနောက် အထမ်းဖြင့် အမီ ပြန်လိုက်ရပြန်သည်။ မီသောအခါ မောကြီးပမ်းကြီး လေသံဖြင့် မေးလေသည်။

"ဟေ့ ဟေ့ ကျုပ်ကို ဒီလိုလုပ်ရင် ကောင်းမယ်လို့ အကြံပေးတဲ့ ခင်ဗျားက ဘယ်သူပါလိမ့်"

ထိုလူက ဤသို့ ပြန်ဖြေကြားပါသည်။

"ကျနော်က ရွာစဉ် လှည့်တောင်းစားနေတဲ့ သူတောင်းစား တယောက်ပါခင်ဗျ"

"ဘာကွ မင်းကသူတောင်းစား ဟုတ်လား"

"ဟုတ်ပါတယ်ခင်ဗျ"

ထိုအခါ မြက်ထမ်းသမားသည် စိတ်ဆိုးမာန်ဆိုးဖြင့် ဤသို့ပြောလေသည်။

"ငါ့ကွာ စောစောက မသိခဲ့မိလို့ မင်းလို သူတောင်းစားက ပေးတဲ့အကြံကို လက်မခံရေးချ မခံဟေ့။ ငါ့ဟာငါ နဂိုကလိုဘဲ ပြန်ထမ်းတော့မယ် သူတောင်းစားရဲ့"

မြက်ထမ်းသမားဟာ မူလထမ်းလာစဉ်ကလို ရှေ့တွင် ကျောက်တုံးအစားထိုးကာ မြက်ထုံးကို ပြန်ထမ်းသွားပါလေတော့သတည်း။

လူတွေဟာ ကိုယ်လုပ်တာလည်း အချိုးမပြေသေးဘူး အမြင်မတော်လို့ အကြံဉာဏ်ကောင်း ပေးပြန်တော့လည်း လူတန်းစားနှိမ့်ချပြီး လက်မခံချင်ကြဘူး။ လောကကြီးမှာ ဒီလိုလူစားမျိုးတွေလည်း များမှများဘဲဗျာ။ crd