သည်းကြီးမည်းကြီးမိုးရွာနေတုန်းမှာ လမ်းဘေးခွေးလေးတွေနဲ့ ထီးအတူတူမျှဆောင်းခဲ့တဲ့ ရဲအရာရှိကြီး

ကမ္ဘာပေါ်မှာ လမ်းဘေးခွေးလေးတွေက အများကြီးရှိကြပါတယ်။ သူတို့မှာ နေစရာအိမ်မရှိတဲ့အပြင် ချစ်ခြင်းမေတ္တာကိုလည်း မရရှိကြပါဘူး။ ကံမကောင်းတဲ့အခါ လူတွေရဲ့ရက်စက်ခြင်းကိုလည်း ခံစားရပါသေးတယ်။

လမ်းဘေးခွေးလေးတွေမှာ နေစရာအိမ်မရှိတာကြောင့် ရာသီဥတုဒဏ်ကို ဆိုးဆိုးရွားရွားခံစားရပါတယ်။ မကြာသေးခင်က မိုးရေထဲမှာ ရဲအရာရှိတစ်ယောက်က လမ်းဘေးခွေးလေးတွေကို ထီးလေးနဲ့ အုပ်မိုးပေးထားတဲ့ပုံလေးက ဆိုရှယ်မီဒီယာတွေမှာ ပျံ့နှံသွားခဲ့ပါတယ်။

Tarun Kumar Mandal က အိန္ဒိယနိုင်ငံ၊ Kolkata မြို့က ရဲအရာရှိတစ်ယောက်ဖြစ်ပါတယ်။ သူဟာ လမ်းဖြတ်သွားရင်းနဲ့ ခွေးလေးတွေ မိုးမိနေတာကို တွေ့သွားခဲ့ပါတယ်။ မိုးတွေက သည်းကြီးမည်းကြီး ရွာနေပြီး Tarun က ထီးဖွင့်ပြီး ဆောင်းလိုက်ပါတယ်။

အဲဒီအချိန်မှာ လမ်းဘေးခွေးလေးနှစ်ကောင်က သူ့အနားကို ရောက်လာပါတယ်။ Tarun က ခွေးလေးတွေကိုလည်း မိုးမမိအောင် ထီးနဲ့ မိုးပေးထားလိုက်ပါတယ်။

ဒီလိုကြင်နာတတ်တဲ့အပြုအမူလေးက လူအများကြားမှာ ပျံ့နှံသွားပါတယ်။ ဓာတ်ပုံလေးကိုတော့ Sayn Chakraborty က အမှတ်မထင် ရိုက်ကူးခဲ့လိုက်တာ ဖြစ်ပါတယ်။ ဒီဓာတ်ပုံလေးကို Kolkata ရဲဌာနက ပြန်လည်မျှဝေတဲ့အခါ လူသိပိုများလာခဲ့ပါတယ်။