အစားအစာတွေထဲမှာ ဝင်နေတတ်တဲ့ ပိုးမွှားတွေကို အလွယ်တကူဖယ်ရှားနည်း

မီးဖိုအသုံးအဆောင်ပစ္စည်းတွေမှာ ပိုးမွှားတွေ ဝင်နေတဲ့အခါ အရမ်းကို စိတ်အနှောင့်အယှက်ဖြစ်ရမှာပါ။ ပိုးမွှားတွေ ဝင်တာကြောင့် အစားအစာတွေကိုလည်း လွှင့်ပစ်လိုက်ရမှာပါ။

အဲဒါကြောင့် အစားအစာတွေထဲမှာ သောင်းကျန်းနေတတ်တဲ့ ပိုးမွှားတွေကို ဖယ်ရှားနိုင်မယ့်နည်းလမ်းလေးတွေကို ဖော်ပြပေးလိုက်ပါတယ်နော်။

မီးဖိုထဲက ဟင်းချက်တဲ့ ဆန်မှုန့်၊ ဂျုံမှုန့်၊ ပြောင်းကော်မှုန့်တွေထဲမှာ ပိုးဖလံလေးတွေကို အတွေ့ရမှားပါတယ်။ ခြောက်သွေ့တဲ့အစားအစာတွေထဲမှာတောင် ပိုးဖလံတွေက ဥချပြီး အဆပေါင်းများစွာ ပွားသွားတတ်ပါတယ်။

၂ ပတ်ခန့်ကြာပြီးနောက်မှာ ဥကနေ အကောင်ပေါက်လာပြီး ဆန်မှုန့်တွေ၊ ပဲတွေကို စားပါတော့တယ်။ အဲဒီကနေ ပိုးဖလံတွေက အစားအစာတွေထဲမှာ ပွားသထက်ပွားပြီး မျိုးဆက်လိုက် နေထိုင်ကြပါတယ်။

အစားအစာတွေထဲ ဝင်နေတတ်တဲ့ ပိုးမွှားတွေကို ဘယ်လိုဘယ်ရှားမလဲ။

အဆင့် ၁

မီးဖိုခန်းကို သန့်ရှင်းရေးလုပ်တဲ့အခါ ကြောင်အိမ်၊ ဗီရိုတို့ကို ပိုပြီးဂရုတစိုက် သန့်ရှင်းရေးလုပ်သင့်ပါတယ်။ ကြောင်အိမ်နဲ့ ဗီရိုထဲက အစားအစာတွေ၊ ပန်းကန်၊ ဇွန်း၊ အခြားသောအသုံးအဆောင်တွေအားလုံးကို ထုတ်ပြီး သန့်ရှင်းရေးလုပ်တာက ပိုကောင်းပါတယ်။

အဆင့် ၂

ပိုးတွေက အထုတ်ထဲမှာ ဝင်နေတဲ့အခါ တစ်ထုပ်လုံးကို လွှင့်ပစ်သင့်ပါတယ်။ ဆက်ပြီး သုံးနေတဲ့အခါ ကျန်းမာရေးအတွက် ထိခိုက်လာနိုင်တာကြောင့်ပါ။ အချို့သော အစားအစာတွေကို ရေခဲသေတ္တာ သို့မဟုတ် အအေးခန်းထဲမှာ သိမ်းထားသင့်ပါတယ်။

ပိုးကောင်တွေရဲ့ဥတွေက အအေးဒဏ်ကို ခံနိုင်ရည်မရှိတာကြောင့်ပါ။ ကြောင်အိမ်ထဲမှာ သိမ်းထားတဲ့အခါမှာလည်း လေလုံတဲ့ဘူး၊ အဖုံးကျပ်တဲ့ဘူးတွေထဲမှာပဲ သိမ်းထားသင့်ပါတယ်။

ဂျုံမှုန့်ကို အသုံးပြုတဲ့အခါ ပိုးကောင်တွေမပါအောင် ဇကာနဲ့စစ်ပြီးမှသာ အသုံးပြုသင့်ပါတယ်။

အဆင့် ၃

ကြောင်အိမ်နဲ့ ဗီရိုတွေကို သန့်ရှင်းရေးလုပ်တဲ့အခါ ဖုန်စုပ်စက်ကို အသုံးပြုတာက ပိုကောင်းပါတယ်။ ဖုန်စုပ်စက်က ချောင်ကြားထဲမှာ ကပ်နေတဲ့ ပိုးကောင်ဥတွေကိုပါ စုပ်ယူပေးနိုင်ပါတယ်။

ပိုးကောင်တွေက တစ်နေရာကနေ တစ်နေရာကို ပြောင်းနိုင်ပါတယ်။ အဲဒါကြောင့် တံခါးလက်ကိုင်၊ ပတ္တာကြားတွေထဲကိုပါ ဖုန်စုပ်စက်နဲ့ စုပ်ယူသင့်ပါတယ်။

အဆင့် ၄

ဖျန်းဘူးထဲမှာ ရေနွေးနဲ့ ဆပ်ပြာရည်ကို ထည့်ပြီး ဗီရို၊ ကြောင်အိမ်၊ စင်တွေကို ဖျန်းပေးနိုင်ပါတယ်။ တံခါးနဲ့ ကြမ်းပြင်တွေကိုလည်း ဖျန်းပေးလို့ရပါတယ်။ ပြီးနောက် ရေစိုဝတ်နဲ့ သုတ်ပေးပါ။ ဆပ်ပြာရည်နေရာမှာ ပက်ပါမင့်ဆီကိုလည်း အသုံးပြုနိုင်ပါတယ်။

အဆင့် ၅

ကရဝေးရွက်ကို စက္ကူအိတ်နဲ့ ထည့်ပြီး အစားအသောက်အခြောက်တွေ သိမ်းထားတဲ့နေရာမှာ ထားပေးနိုင်ပါတယ်။ ကရဝေးရွက်ရဲ့ရနံ့ကို ပိုးမွှားတွေက မခံနိုင်တာကြောင့် မြန်မြန်ထွက်ပြေးသွားပါတယ်။

ဒါပေမယ့် ပိုးသတ်ဆေးတွေကိုတော့ အသုံးမပြုသင့်ပါဘူး။ အနီးအနားက စားစရာတွေကို ထိသွားနိုင်တာကြောင့်ပါ။

မီးဖိုခန်းထဲမှာ ပိုးကောင်တွေ ဝင်မလာအောင် ကာကွယ်နည်းများ

- ရှာလကာရည်စွတ်ထားတဲ့ ပိတ်စလေးနဲ့ စင်၊ ကြောင်အိမ်၊ ဗီရိုတို့ကို သုတ်ပေးပါ။

- ခြောက်သွေ့တဲ့အစားအစာတွေကို အဖုံးတင်းကျပ်တဲ့ဘူးထဲမှာသာ သိမ်းဆည်းပါ။

- အစားအစာတွေကို မဝယ်ခင်မှာ စစ်ဆေးတာက ပိုကောင်းပါတယ်။ အစားအစာရဲ့အထုပ်က ပေါက်နေရင် ပိုးမွှားတွေက အလွယ်တကူ ဝင်လာနိုင်တာကြောင့်ပါ။

- အစားအစာအခြောက်တွေ ထားတဲ့စင်တိုင်းမှာ ကရဝေးရွက်ကို ထားပါ။

- အစားအစာအခြောက်တွေကို မကြာခဏစစ်ဆေးပေးပါ။

Zombie (lovemedia)