အတွေးတွေရဲ့ ပဲ့တင်သံ

တရက်မှာ စီးပွားရေး လုပ်ငန်းရှင်တယောက်ဟာ လမ်းဘေးမှာ ခဲတံလေးတွေ ရောင်းပြီး ငွေတောင်းနေတဲ့ လူတယောက်ရဲ့ ခွက်ထဲကို တဒေါ်လာ ထည့်လိုက်ပါတယ်။ ပြီးတော့ သုတ်သီးသုတ်ပျာနဲ့ရထားပေါ်ကို ပြေးတက် သွားပါတယ်။

နောက်မှ သတိရပြီး ရထားပေါ်က ပြန်ဆင်းလာကာ စောစောက သူ ငွေထည့်ပေးခဲ့တဲ့ သူဆီ ပြန်သွားပြီး ခွက်ထဲက ခဲတံတချောင်းကို နှိုက်ယူလိုက်ပါတယ်။

ပြီးတော့သူက အလောတကြီး ဖြစ်နေလို့ ငွေထည့်ပြီး ခဲတံယူဖို့ မေ့သွားတယ်လို့ ပြုံးပြပြီး ပြောပါတယ်။ နောက်ပြီး သူက ငွေတောင်းနေသူကို ပြောတယ်။

"ခင်ဗျားလည်း ကျွန်တော့်လို စီးပွားရေးလုပ်ငန်းရှင် တယောက်ပဲလေ။ ခင်ဗျားမှာ ရောင်းစရာတွေ ရှိနေပြီး ဒါတွေကို သင့်တင့်မျှတတဲ့ ဈေးနှုန်း သတ်မှတ်ထားတာပဲ မဟုတ်လား။ ကြိုးစားပါ" လို့ ပြောပြီး ရထားပေါ် တက်သွားခဲ့ပါတယ်။

နောင်နှစ်ပေါင်းများစွာ ကြာတဲ့အခါ လူမှုရေးပွဲလမ်းသဘင် တခုမှာ သားသားနားနား ဝတ်စားထားတဲ့ သူတယောက်က စီးပွားရေး လုပ်ငန်းရှင်ကြီးထံလာပြီး သူ့ကိုယ်သူ မိတ်ဆက်ပါတယ်။

"ခင်ဗျားကတော့ ကျွန်တော့်ကို မှတ်မိမှာ မဟုတ်ပေမယ့် ခင်ဗျားကို ကျွန်တော် ဘယ်တော့မှာ မေ့မှာမဟုတ်ပါဘူး။ ခင်ဗျားနဲ့ မတွေ့မီ အချိန်အထိတော့ ကျွန်တော်ဟာ ခဲတံလေးတွေ ရောင်းတဲ့ သူတောင်းစား တယောက်ပါပဲ။

ဒါပေမယ့် ခင်ဗျားက ကျွန်တော့်ကို စီးပွားရေး လုပ်ငန်းရှင်ပဲလို့ ပြောသွားခဲ့တဲ့ အချိန်က စပြီး၊ ကျွန်တော်ဟာ စီးပွားရေး လုပ်ငန်းရှင် ဖြစ်သွားတယ်" လို့ ပြောခဲ့ပါတယ်။

သူဟာ သူ့ကိုယ်သူ သူတောင်းစားပဲလို့ တွေးတောထားတဲ့ အမြင်ကနေ ရုတ်တရက် စကားတခွန်းကြောင့် သူ့အတွေးတွေ ပြောင်းသွားတယ်။

သူ့ကိုယ်သူ အဲ့ဒီအချိန်ကစပြီး သူဟာ စီးပွားရေး လုပ်ငန်းရှင် တယောက်ပဲလို့ တွေးတောခဲ့တယ်။ စီးပွားရေး လုပ်ငန်းရှင် တယောက်လို စတင် ကျင့်သုံး ပြုမူခဲ့တယ်။ သူအတွေးတွေဟာ သူ့ဘဝရဲ့ ပဲ့တင်သံတွေ ပါပဲ။

မိမိအတွေး ပုံရိပ်ထဲမှာ "ငါဟာ သူတောင်းစားပဲ" လို့ တွေးပါများရင် "ငါဟာ သူတောင်းစားပဲ" ဆိုတဲ့ အသံသာ အထပ်ထပ်ပြန်ကြားနေရမှာပါ။

"ငါဟာလုပ်ငန်းရှင်ပဲ" လို့ တွေးလိုက်တာနဲ့ "ငါဟာ လုပ်ငန်းရှင်ပဲ" ဆိုတဲ့ အတွေးပဲ့တင်သံ ပြန်လာမှာ အသေအချာပါပဲ။

နောက်ပြီး ဒီပုံပြင်လေးထဲက စီးပွားရေး လုပ်ငန်းရှင်ကြီးလို သင်လည်း သူတပါးကို အကောင်းမြင်ပြီး စိတ်ခွန်အား ဖြစ်စေမယ့် စကားလုံးတွေနဲ့ ကူညီနိုင်ပါတယ်။

လူတွေရဲ့ ခန္ဓာကိုယ်ထဲမှာ ပါရမီတွေ၊ အစွမ်းအစတွေ ရှိနေကြပါတယ်။ ဒါတွေကို သင်က နှိုးဆွပေးလိုက်ရုံနဲ့ သူ့ကိုယ်ထဲက အစွမ်းအစတွေဟာ အငြိမ်မနေနိုင်ပဲ စွမ်းအားတွေ အဖြစ်ထွက်ပေါ်ကာ သူ့ဘဝတခုလုံးကို ပြောင်းလဲ သွားစေနိုင် ပါသေးတယ်။

ဒီလိုနည်းနဲ့ သင်က လူတွေရဲ့ ဘဝတွေကို တိုးတက် အောင်မြင်သွားအောင် စေတနာ စိတ်ဓာတ် အပြည့်နဲ့ ကူညီပေးမယ် ဆိုရင် သင့်ကူညီမှုရဲ့ ပဲ့တင်သံတွေဟာ သင့်ထံ ပြန်လာမှာ မလွဲမသွေပါပဲ။

တခြားသူတွေရဲ့ ဘဝကို မြှင့်တင်ပေးခြင်း အားဖြင့် သင်ကိုယ်တိုင်လည်း သေချာပေါက် တိုးတက် အောင်မြင်လာမှာ ဖြစ်တယ်ဆိုတာ အာမခံပါတယ်။ သင်ပြုတဲ့ကံ၊ ပဲ့တင်သံ၊ သင့်ထံ ပြန်လာမှာပဲ ဖြစ်ပါတယ်။ Crd

Post a Comment

0 Comments