အလွယ်လိုက်သော ငှက်ကလေး

တခါတုန်းက ဘီလုံးငှက်တကောင်ဟာ တောစပ်တခုက သစ်ပင်တခုမှာ နေထိုင်ပါသတဲ့။ ဘီလုံးငှက်ဟာ နေ့စဉ်နေ့တိုင်း အပင်ခြေရင်းကို ဆင်းပြီး တီကောင်၊ ပိုးကောင် စတာတွေကို ရှာဖွေ စားသောက် ပါသတဲ့။ တီကောင်တွေဟာ ဘီလုံးငှက်အတွက် အဓိက စားနပ်ရိက္ခာတွေပဲ ဖြစ်တယ်။

ဒါပေမယ့်လည်း ဘီလုံးငှက်ဟာ သူ့ရဲ့ နေ့စဉ်လုပ်နေကျ အစာရှာဖွေခြင်း အလုပ်ကို ပုံမှန် မလုပ်ချင်ဘဲ ပျင်းရိနေ ပါသတဲ့။ "တီကောင်တွေကို ငါရှာဖွေစရာ မလိုဘဲ အလိုအလျောက် ငါ့ရှေ့ကို ရောက်လာရင် ကောင်းမှာပဲ" လို့ ဘီလုံးငှက်က တကိုယ်တည်း ပြောဆိုနေခဲ့တယ်။

တနေ့တော့ ဘီလုံးငှက်ဟာ အစာရှာဖွေ စားသောက်ပြီးလို့ သစ်ပင်ထက်မှာ နားနေခဲ့တယ်။ အဲဒီလို ဘီလုံးငှက် နားနေတုန်းအခိုက်မှာပဲ လူတယောက်ဟာ ရေပုံးတပုံးကို ဆွဲလို့ ဘီလုံးငှက် နားနေတဲ့ သစ်ပင်နားက ဖြတ်သွားပါသတဲ့။

အဲဒီလို ရေပုံးကို ဆွဲပြီး ဖြတ်သွားတဲ့ သူကို မြင်တဲ့အခါ ဘီလုံးငှက်က ဒီလိုပြောတယ်။ "ဗျို့ မိတ်ဆွေကြီး ရေပုံးကြီးဆွဲလို့ ဘယ်သွား မလို့တုန်းဗျ"

အဲဒီလို ဘီလုံးငှက်ရဲ့ နှုတ်ခွန်းဆက် စကားကို ကြားတဲ့အခါ ထိုသူက "အို ဘီလုံးငှက်လေး ပါလား။ ငါ့ရေပုံးထဲမှာ တီကောင်တွေပါတယ်လေ။ မြို့က ဈေးထဲမှာ တီကောင်နဲ့ ငှက်မွှေးနဲ့ လဲလှယ်ပြီး ငှက်မွှေးကို အဝတ်အထည်၊ ခေါင်းအုံး၊ ကြက်မွှေးတွေ လုပ်တဲ့ နေရာမှာ သုံးဖို့ မြို့ကို သွားမလို့ပါ"

အဲဒီလို ပြန်ကြားစကားကို ကြားတဲ့အခါ ဘီလုံးငှက်က "ဟာ ဒါဆိုအတော်ဘဲ။ ခင်ဗျားက ငှက်မွှေး လိုချင်တယ် ကျွန်တော်က တီကောင် လိုချင်တယ်။ ဒါအဆင်ပြေတာပဲ။ ခင်ဗျား မြို့ထဲအထိ မသွားနဲ့တော့။ ကျွန်တော့်ကို ခင်ဗျားရဲ့ တီကောင်တွေပေး။ ကျွန်တော်က ခင်ဗျားကို အမွှေးတွေ နှုတ်ပေးလိုက်မယ်"

အဲဒီလိုနဲ့ ထိုလူနဲ့ ဘီလုံးငှက်ဟာ အပြန်အလှန် သဘောတူညီမှု ရကြပြီး တီကောင်ပုံးကို ဘီလုံးငှက်က ရခဲ့ပါသတဲ့။ ဘီလုံးငှက်ကလည်း သူ့ခန္ဓာကိုယ်မှာ ပေါက်နေတဲ့ အမွှေးအတောင် တော်တော်များများကို နှုတ်ပြီး ပေးလိုက်ပါသတဲ့။ "နောက်လည်း ငှက်မွှေး လိုချင်ရင် လာခဲ့နော်" လို့ ဘီလုံးငှက်က မှာကြားလိုက် ပါသေးတယ်။

အဲဒီလိုနဲ့ နောက်နေ့တွေ မှာလည်း ထိုလူဟာ ဘီလုံးငှက်ဆီ ရောက်လာပြီး တီကောင်နဲ့ ငှက်မွှေး အလဲအလှယ် လုပ်ခဲ့ပြန်တယ်။ အဲဒီလိုနဲ့ နေ့ရက် တော်တော်များများ ကုန်ဆုံးလာတဲ့ အခါ ဘီလုံးငှက်မှာ အမွှေးအတောင် ရယ်လို့ တစုံတရာမှ မကျန်တဲ့ အဖြစ်ကို ရောက်လာပါသတဲ့။

ထိုလူ ရောက်လာတဲ့ အခါမှာလည်း "ခင်ဗျားက အမွှေးမှ မရှိတော့တာ။ ဒီတော့ ကျုပ်လည်း တီကောင်မပေးနိုင်ဘူး" ဆိုပြီး ထွက်ခွာသွား ပြန်သတဲ့။

နောက်ဆုံးမှာတော့ ဘီလုံးငှက်ဟာ အမွှေးအတောင် မရှိတဲ့ ငှက် ဖြစ်လာခဲ့သတဲ့။ အဲဒီလို အမွှေးအတောင် မရှိတော့တဲ့ အတွက်လည်း သူဟာ ပျံသန်းခြင်း၊ အစာရှာဖွေခြင်း တွေကို မပြုလုပ်နိုင် တော့ဘဲ ငတ်မွတ် လာပါသတဲ့။ တဖြည်းဖြည်း ငတ်မွတ်အားနည်း လာခဲ့တဲ့ နောက်မှာတော့ ဘီလုံးငှက်ဟာ အပင်အောက်ကို ပြုတ်ကျပြီး သေပွဲဝင်ခဲ့ရ ပါတော့တယ်။

တကယ်တော့ ကျွန်တော်တို့ဟာလည်း ဘီလုံးငှက်ရဲ့ နေ့စဉ် အစာရှာဖွေခြင်းနဲ့ တူတဲ့ ကိုယ့်ရဲ့ နေ့စဉ်လုပ်ငန်း ဆောင်တာတွေကို လုပ်ကိုင်ဖို့ ငြီးငွေ့နေကြသူများပဲ ဖြစ်ပါတယ်။

ဘဝရဲ့ ပင်ပန်းခြင်းမှာ လုံးချာလည် လိုက်လာရင်း ဘီလုံးငှက်ရဲ့ ကိုယ့်ရှေ့ကိုရောက်လာမယ့် ပွပေါက်ကို စောင့်မျှော်နေသလို ကျွန်တော်တို့ တတွေဟာလည်း မိမိရဲ့ အားစိုက်ထုတ်ခြင်း တစုံတရာ မပါဝင်တဲ့ ပွပေါက်တွေ၊ အချောင်ကွက်တွေကို စောင့်မျှော်နေကြသူများပဲ ဖြစ်တယ်။

အဲဒီလို စောင့်မျှော်ရင်း ဘီလုံးငှက်ရဲ့ တီကောင်နဲ့ ငှက်မွှေး အလဲအလှယ် လုပ်သလို၊ ကျွန်တော်တို့တွေ ဟာလည်းပဲ မိမိရဲ့ ဘဝကို ပြောင်းလဲသွားနိုင်တဲ့ မိမိပိုင် ငွေကြေးဥစ္စာတွေကို "ပွပေါက်" တခုအတွက် အလဲအထပ် လုပ်တတ်ကြတယ် လို့ ဆိုတယ်။

တလုံး၊ နှစ်လုံး၊ သုံးလုံး စတဲ့ အလုံးပေါင်း မြောက်များစွာကို စိတ်ကူး ဖဲရိုက်ရင်း မိမိရဲ့ နေ့စဉ် လူနေမှုဘဝအတွက် ငွေကြေးဥစ္စာတွေကိုပါ ရင်းနှီးလှဲလှယ် ကြပြန်တယ်။

အဲဒီလို အလဲအလှယ် လုပ်ကြတဲ့အခါ ဘီလုံးငှက်ရဲ့ အမွှေးအတောင် ဆုံးရှုံးပြီး အစာရှာဖွေ မစားနိုင်တော့သလို၊ ကျွန်တော်တို့တွေဟာလည်းပဲ မိမိရဲ့ အလိုလောဘနဲ့ အချောင်ရလိုမှု ကြောင့်ပဲ ကိုယ်ပိုင်ဘဝနဲ့ စီးပွားဥစ္စာတွေ ဆုံးရှုံးရ ပြန်တယ်။

ဘီလုံးငှက်ဟာ ငတ်မွတ်ခေါင်းပါးပြီး သေဆုံးရသလို ကျွန်တော်တို့တွေဟာလည်း စီးပွားဥစ္စာ ပျက်စီးခြင်းကြောင့်ပဲ ဘဝတခုလုံး သေသွားရလိမ့်မယ်လို့ ဆိုပါတယ်။

Success is not easy and it is certainly not for the lazy. အောင်မြင်ခြင်းဟာ မလွယ်ကူဘူး၊ ပျင်းရိသူတွေ အတွက်လည်း အောင်မြင်မှု ဖြစ်မလာဘူး။ တကယ်တော့ ဘဝရဲ့ ငွေကြေးဥစ္စာ ပြည့်စုံခြင်းဟာ တစုံတရာသော အားစိုက်ထုတ်မှု မရှိဘဲ အလိုအလျောက် ဖြစ်မလာဘူးလို့ ဆိုလိုတာပဲ ဖြစ်ပါတယ်။

ကျွန်တော်တို့ဟာလည်း အဲဒီသဘောကို ဆင်ခြင်ပြီး မိမိရဲ့ ချွေးနဲ့ အရင်းအနှီး ပြုအပ်သော ငွေကြေးဥစ္စာကိုသာ မက်မောသင့်လှတယ်။ "ငါ၏ ချွေးစက်နှင့် ရင်းသော ငွေကြေးကိုသာ မက်မော၏" ဆိုတဲ့ စကားကို နှလုံးသွင်းရင်း ကျေနပ် နှစ်သိမ့်စေသင့်လှတယ်။

ငွေမက်တတ်ကြတဲ့ လူသားချင်းအတူတူ မိမိရဲ့ လုံ့လနဲ့ရင်းတဲ့ ငွေကြေးကိုသာ မက်မောသင့်လှ ပါတယ်။ လုံ့လနှင့် ရင်းနှီးပြီး ကြီးပွားတိုးတတ် ကြပါစေ။ phyothuta