ကြက်ဖကြီးနှင့် မြေခွေး

တခါက ရွာတရွာမှာ ကြက်ဖတကောင် ရှိတယ်။ မနက်ခင်းမှာ စောစောထပြီး တွန်သံပေးရတဲ့ သူ့ရဲ့ တာဝန်ကို သူက ကျေပွန်ပါတယ်။ တနေ့မှာတော့ ကြက်ဖက သစ်ပင် ထိပ်ဖျားမှာ နားနေတုန်း မြေခွေးတကောင်က ထိုအနားကို ရောက်လာပါတယ်။

မြေခွေးက ကြက်ဖကို မြင်လိုက်တဲ့အခါ ကြက်ဖကို စားဖို့ ကြံပါတော့တယ်။ အဲဒါကြောင့် မြေခွေးက ချိုသာတဲ့ အသံနဲ့ ကြက်ဖကို စကားပြော ပါတော့တယ်။

"အဆွေကြက်ဖ မင်းဆီကို ကောင်းကင်ဘုံက သတင်းတခု လာပြောပြတာပါ။ငှက်တွေ အားလုံးနဲ့ တိရိစ္ဆာန်တွေဟာ မိတ်ဆွေဖြစ်ပြီး ငြိမ်းချမ်းစွာ အတူ နေထိုင်ကြရမယ်တဲ့" လို့ မြေခွေးက ပြောလိုက်ပါတယ်။

ထိုအခါ ကြက်ဖက ပြန်မေးပါတယ်။ "အဲဒါ တကယ်ပဲလား" "ဟုတ်တာပေါ့ တကယ် ပြောတာပါ။ အဲဒါ မှန် မမှန် သိချင်ရင် မင်း အောက်ကို ဆင်းလာခဲ့ပါလား" လို့ ထပ်ပြော ပြန်တယ်။

အဲဒီမှာ ကြက်ဖက ဉာဏ်ရှိစွာနဲ့ "ကောင်းပြီလေ ခဏတော့ စောင့်နိုင်တယ် မဟုတ်လား။ အခြားသော သူငယ်ချင်း တွေလည်း ထပ်လာကြ လိမ့်မယ်" လို့ ပြန်ဖြေလိုက် ပါတယ်။ အဲဒီအခါ မြေခွေးက အံ့အားသင့် သွားပါတယ်။ "ဟုတ်လား ဘယ်သူတွေ လာကြအုံးမှာတုန်း"

ထိုအခါ ကြက်ဖက ပြန်ဖြေလိုက် ပါတယ်။ "အမဲလိုက်ခွေးတွေ လာနေတာ ငါမြင်နေရတာ။ သူတို့ကို ခဏလောက် စောင့်လိုက်ပါအုံး"

အမဲလိုက်ခွေး လို့လည်း ကြားရော မြေခွေးက လန့်သွား ပါတော့တယ်။ ကြက်ဖ ရှိတဲ့ အပင်အောက် ကနေ ထွက်ပြေးသွားပါတော့တယ်။ ကြက်ဖက အော်မေးလိုက် ပါသေးတယ်။

"ဟ ဘာလို့ ထွက်ပြေးသွားတာတုန်း။ အမဲလိုက်ခွေး တွေနဲ့ သူငယ်ချင်း မဖြစ်ချင်ဘူးလား" လို့မေးလိုက်တဲ့အခါ မြေခွေးက ပြန်ဖြေပါတယ်။

"အဲဒါကို မေ့လိုက်တော့" လို့ ဖြေပြီး ထိုနေရာ ကနေ အလျင်အမြန် ပြေးထွက်သွား ပါတော့တယ်။ ဉာဏ်ရှိတဲ့ ကြက်ဖကတော့ မြေခွေးစားမယ့် ဘေးကနေ လွတ်မြောက် သွားပါတော့တယ်။

ဒီပုံပြင်လေး ကတော့ ဉာဏ်ရှိတဲ့ အတွက် အသက်ဘေးက လွတ်မြောက်သွားတဲ့ ကြက်ဖကို နမူနာ ပြထားပြီး ဉာဏ်ပညာ ရှိခြင်းက မရိုးသား၊ ကောက်ကျစ်စဉ်းလဲ သူတွေ ကိုတောင် ကျော်လွှားနိုင်ကြောင်း သင်ခန်းစာ ပေးထားပါတယ်။

လူတယောက်မှာလည်း ဉာဏ်ပညာရှိခြင်းက ဘဝတခုလုံးကို မကောင်းတဲ့ သူတွေ၊ ကိုယ့်ကို ဖျက်ဆီးမယ့် သူတွေရဲ့ ဘေးကနေ ကယ်ဆယ်ပေးနိုင်ကြောင်း၊ ဉာဏ်ပညာ ရှိခြင်းက ဘဝတခုလုံးမှာ အရေးကြီးကြောင်း သင်ခန်းစာ ပေးထားပါတယ်။ phoomyatchal

Post a Comment

0 Comments