ပဌမဆုံး ဧည့်သည်

ဆံသဆိုင် တဆိုင်တွင် ဆံပင်ညှပ်သူ များနှင့် စည်ကားနေ၏။ ဆံပင်ညှပ်ဆရာ တယောက်မှ လွဲပြီး ကျန်ဆံသဆရာ အားလုံးမှာ ဆံသပေးနေ ကြလေသည်။ ထို ဆံသဆရာ လူငယ်လေး တဦးသည် စိတ်လှုပ်ရှားခြင်း များစွာဖြင့် ဆံပင်လာညှပ်မည့် ဧည့်သည်ကို မျှော်နေမိ၏။

ယနေ့မှစကာ ဆိုင်ပိုင်ရှင်က သူ့ကို ဆံသခွင့် ပေးလိုက်သည်။ သူသည် ထိုဆိုင်တွင် အောက်ခြေသိမ်း အလုပ်များနှင့် ခေါင်းလျှော်သည့် အလုပ်တွေ၂ နှစ် လုပ်ရင်း ဆံပင်ညှပ်ပညာကို သင်ယူခဲ့ရပြီး ယနေ့သည် သူ၏ ပထမဆုံးသော ဧည့်သည်ကို ဆံသ ပေးရမည့် နေ့ ဖြစ်နေလေသည်။

သူတို့ ဝန်ထမ်းအချင်းချင်း ဆံသပေးဖူး သော်လည်း သူ၏ ပထမဆုံးသော ဧည့်သည်ကို ဆရာ မကူဘဲ ညှပ်ရတော့မည် ဖြစ်သောကြောင့် သူ၏ ရင်ထဲတွင် ကြောက်သလိုလို၊ ပျော်သလိုလို ဖြစ်နေလေသည်။ သူတွေးနေစဉ် ဧည်သည့်နှစ်ဦးက ဆိုင်ထဲ ဝင်လာကြသည်။

"မင်္ဂလာပါခင်ဗျာ ဆံပင်ညှပ်မှာလား ဆရာ"

"အေး အာကာ အားပြီးလား"

"ဦးမိုးရေ ခဏစောင့်ပါဦး။ ဒီတယောက် ပြီးရင် ရပါပြီ"

သူပင် မဖြေလိုက်ရ။ အာကာက ဆံသနေရင်း လှမ်းအော်သည်။ ဆံပင် လာညှပ်သည့် လူအားလုံးက သူတို့ညှပ်နေကျ လူတွေနှင့်သာ စောင့်ညှပ် ကြသည်။ "ဆရာ ကြွပါခင်ဗျာ" သူ တွေးနေတုန်း လူတယောက် ဝင်လာ၍ ပြောနေကျ စကားက အလိုလို ထွက်သွားသည်။

"မင်္ဂလာပါခင်ဗျာ ဆံပင်ညှပ်မှာလား ဆရာ"

"အင်း" သူ၏ စိတ်ထဲတွင် ထိုလူ့၌ ညှပ်နေကျ ဆံသဆရာ မရှိပါစေနှင့်ဟု ဆုတောင်းနေမိသည်။

"ညှပ်လို့ ရပြီလား။ စောင့်ရဦးမှာလား"

"ရပါပြီဆရာ"

ဆံပင်ညှပ်မည့် နေရာကို ဦးဆောင် ခေါ်သွားရင်း သူ၏ စိတ်ထဲ ပျော်ရွှင်နေမိသည်။

"ဆရာ ထိုင်ပါခင်ဗျာ" ဧည့်သည်၏ ကိုယ်ပေါ်တွင် ခြုံလွှာလွှားရင်း "ဆရာ ဘယ်လိုကေ ညှပ်မလဲဗျ"

"ဒီပုံအတိုင်းပဲ။ တိုပေး။ ပါးပေး"

"ဟုတ်ကဲ့ဆရာ"

"သေချာ ညှပ်နော်။ ဧည့်သည် မကြိုက်ရင် မင်း နောက်နေ့ မညှပ်ရဘူး" ဆံပင်ညှပ်ဆရာ အကြီးတယောက်က သူ့ကို လှမ်းအော်သည်။

ဧည့်သည်ရှေ့တွင် လှမ်းအော်သော အကြီးကို စိတ်ထဲက ကျိန်ဆဲမိသည်။ ဘာကြောင့်များ ဧည့်သည် ကွယ်ရာမှာ မပြောပါလိမ့်။ ဧည့်သည်၏ မျက်ဝန်းတွေကို ကြည့်မိတော့ သူ့ကို အထင်သေးသည့် အရိပ်တွေ မတွေ့ရ၍ တော်ပါသေးရဲ့ ဟု တွေးလိုက်မိသည်။

သူ၏ လက်တွေက ဆံသပစ္စည်း တချို့နှင့် ရောထွေးကာ ကချေသည်လို လှုပ်ရှားနေမိသည်။ စိတ်လှုပ်ရှားခြင်းကို အတတ်နိုင်ဆုံး ဖုံးကွယ်ထား သော်လည်း ညှပ်စတွင် လက်တွေက တုန်ရီနေမိသည်။

သူ ကြိုးစား ညှပ်သော်လည်း ဘယ်နှင့်ညာဘက် ခေါင်းက ဆံပင်တွေက မညီ။ သိသာလောက်အောင် ရုပ်ပျက် ဆင်းပျက်တော့ မဖြစ်။ ဧည့်သည်က မှန်တွင် ကပ်ထားသော "ဝန်ထမ်းများ ဆက်ဆံရေး မပြေပြစ်ပါက ဖုန်းဆက် တိုင်နိုင်ပါသည်" ဟူသော စာတမ်းကို ကြည့်နေသည်။

သူ၏ ဆံပင်ညှပ်ပုံ မကောင်းကြောင်း အတိုင်ခံရလျှင် ဆိုင်ပိုင်ရှင်က သူ့ကို ခေါင်းလျှော်သည့် နေရာကို ပြန်ပို့မှာ သူ ကြောက်မိသည်။

"ဆရာ ပြီးပါပြီခင်ဗျာ။ ခေါင်းလျှော်ဦးမလား ဆရာ" နောက်ကြည့်မှန်နှင့် ခေါင်းအနောက်ဘက်ကို ပြရင်း သူမေးတော့ ဧည့်သည်က "မလျှော်တော့ဘူး ညီလေး။ ကျေးဇူးပဲ။ ဆံပင်ညှပ်တာ ပုံစံလေး ကောင်းတယ်"

ဧည့်သည်က ကျသင့်ငွေ ရှင်းပြီး ပြန်သွားတော့မှ ရင်ထဲက အပူလုံးကြီးကို ဟူး ခနဲ မှုတ်ထုတ် လိုက်ရသည်။ "ငါ လုပ်နိုင်တယ်ကွ" ဟု တွေးကာ ပျော်ရွှင်သွားမိသည်။

နောက် တနှစ် ခန့်ကြာသော်။ "မင်္ဂလာပါခင်ဗျာ ဆံပင်ညှပ်မှာလားဆရာ" သူ၏ အသံတွေ ထဲတွင် ယုံကြည်ချက်တွေ အပြည့်ပါနေလေသည်။ တနှစ်အတွင်း သူ ကိုင်ခဲ့ရသည့် ခေါင်းတွေက များခဲ့သောကြောင့် ဆံပင်ညှပ်သည့် ကိစ္စက သူ့အတွက် အကျွမ်းတဝင် ဖြစ်နေပေပြီ။

ဧည့်သည် တဦး၏ ဆံပင်ကို ကျွမ်းကျင်စွာ ညှပ်နေရင်း ထိုဧည့်သည်ကို မြင်ဖူးသလို ရှိ၍ စဉ်းစားနေမိသည်။ "ဟာ ဒီဆရာက ငါပထမဆုံး ဆံသပေးခဲ့တဲ့လူပဲ" သူ၏ စိတ်ထဲသာ ပြောနေမိသည်။

"ဆရာ ပြီးပါပြီ ခင်ဗျာ။ ခေါင်းလျှော်ဦးမလား ဆရာ" နောက်ကြည့်မှန်နှင့် ပြရင်း သူမေးတော့ ဧည့်သည်က ပြန်ပြောသော စကားကြောင့် သူ အံ့ဩသွားမိ၏။

"ငါ့ညီလေးတောင် ဆံပင်ညှပ်တာ ကျွမ်းကျင်သွားပြီပဲ"

"ဟာ ဆရာက ကျတော့်ကို မှတ်မိတယ်ပေါ့"

"မှတ်မိတာပေါ့ကွ။ အဲ့ဒီနေ့က ငါ တခြားဆိုင်မှာ ပြန်ပြင်လိုက်ရ သေးတယ်"

သူ အံ့သြ သွားမိသည်။ သူညှပ်ပေးသည့် ဆံပင် မညီတာ သိလျက်နှင့် အဘယ်ကြောင့် ပြဿနာ မရှာရတာလဲ ဆိုတာကို သူ သိချင်မိသည်။ "ဆရာက အဲဒီနေ့က ဆံပင် မညီတာသိပေမဲ့ ကျွန်တော်ကို ဘာလို့ ကျေးဇူးပဲ။ ဆံပင်ညှပ်တာ ပုံစံလေး ကောင်းတယ် လို့ ပြောသွားရတာလဲ" ဧည့်သည် ပြန်ပြောလာမည့် စကားကို မျှော်လင့်ရင်း ဧည့်သည်၏ မျက်ဝန်းတွေကို ငေးမောနေမိသည်။

"ငါ အဲဒီနေ့က မင်းကို ယုံကြည်မှုတွေ ပေးလိုက်တာပါ။ အဲဒီယုံကြည်မှုက အခု မင်းကို အများကြီး အထောက်အကူ ပေးနေမယ်လို့ ငါထင်တယ်။ မင်း စိတ်လှုပ်ရှားနေမှန်း ငါသိပါတယ်။ ငါသာ တခုခု ပြောလိုက်ရင် မင်းရဲ့ စိတ်ထဲ ရမဲ့ ဒဏ်ရာက သေအထိ ပျောက်မယ် မထင်ဘူး။

မင်းက ဆံပင်ညှပ်တတ် ပါတယ်။ စိတ်လှုပ်ရှားပြီး လက် အနည်းငယ် တုန်နေလို့သာ မညီမညာ ဖြစ်ခဲ့ရတာ။ အလွန်ဆုံး ငါ ကတုံး တုံးရရုံပေါ့ကွာ။ ငါ့အတွက် ကြီးကြီးမားမား မထိခိုက်နိုင်ပါဘူး။ ဟား ဟား။

မှတ်ထား ညီလေး။ အလုပ်မှာ မှားမှာ မကြောက်နဲ့။ မမှားဖူးတဲ့ လူဟာ အလုပ် မလုပ်ဖူးတဲ့ လူပဲ။ ဒါပေမဲ့ ထပ်ခါထပ်ခါ မမှားစေနဲ့ပေါ့ကွာ။ အဲတာတော့ မှတ်ထား"

"အကိုက ဘာလို့ အဲလို လုပ်ရတာလဲဟင်" အံ့သြကြီးစွာ သူမေးမိတော့ ဧည့်သည်က သူ နားမလည်သော စကားကို ဆိုသည်။

"ငါ့ယုံကြည်မှုတွေ အသတ်ခံခဲ့ရဖူးလို့ ပါကွာ" ဟမ်စိုင်း

Post a Comment

0 Comments