နွားကို ကူညီသော မြည်း

တခါတုန်းက လယ်မြေ ဧကများစွာ ပိုင်ဆိုင်တဲ့ လယ်သမာကြီး တဦး ရှိပါတယ်။ သူဟာ တိရိစ္ဆာန် တွေရဲ့ ဘာသာစကား ကိုလည်း နားလည်ပါတယ်။ သူ့မှာ နွားတကောင်နဲ့ မြည်းတကောင် ရှိပါတယ်။

တရက်မှာ လယ်သမားကြီးဟာ လမ်းလျှောက်လာရင်း မြည်းနဲ့နွား စကား ပြောနေတာကို ကြားမိပါတယ်။ သစ်ပင် အကွယ်ကနေပြီး သူတို့ နှစ်ယောက် ဘာတွေ ပြောနေတာလဲ ဆိုတာကို နားထောင် ကြည့်ပါတယ်။ နွားက မြည်းကို ပြောပါတယ်။

"မင်းကတော့ ကံကောင်း ပါတယ်ကွာ။ ငါ့လို ပင်ပင်ပန်းပန်း အလုပ် လုပ်စရာ မလိုဘူး။ ငါ့မှာတော့ တနေကုန် တနေခန်း ထယ်ထိုးရတယ်။ နေဘယ်လောက်ပူပူ ငါ့ခြေလက်တွေ ဘယ်လိုပဲ ညောင်းညာ ကိုက်ခဲ နေပေမယ့် နားရတယ် မရှိဘူး။ ငါ့ဘဝ ကတော့ တကယ့်ကို စိတ်ပျက်စရာ အပြည့် ပါပဲ။

ဒါပေမယ့် မင်းကတော့ တကယ့်ကို သက်သက် သာသာနဲ့ ဘဝမျိုးကို ရထားတယ်။ သခင်က တနေရာရာ သွားချင်တယ် ဆိုရင် မင်းကိုယ်ပေါ်ကို အရောင်စုံ အဝတ်လေး လွှမ်းပြီး ဟိုဟို ဒီဒီ ပို့ပေးရတယ်။ ဒါ့အပြင် ဘာမှ လုပ်စရာ မရှိဘူး။ အားနေရင် မြက်စိမ်းလေး စားပြီး အေးအေးဆေးဆေး နေရုံပဲ"

ဒီစကားတွေကို ကြားတော့ မြည်းက သူ့မိတ်ဆွေ ဖြစ်တဲ့ နွားကို သနား သွားပါတယ်။ အဲဒါနဲ့ အကြံပေး ပါတယ်။ "အေး သူငယ်ချင်းရာ မနက်ဖြန် ကြရင် ငါပြောတဲ့ အတိုင်းလုပ်။ မင်း သက်သက်သာသာ နေရ လိမ့်မယ်။

မနက်ဖြန် မနက် မင်းကို လယ်ထွန်ဖို့ လာခေါ်ပြီ ဆိုရင် မြေကြီးပေါ် လှဲပြီး ညည်းတွား နေလိုက်။ ဒါဆို မင်းနေမကောင်း ဖြစ်နေတယ် ဆိုပြီး မင်းကို အနား ပေးလိမ့်မယ်"

ဒီစကားတွေကို ကြားတော့ သခင်လုပ်သူက စဉ်းစားပါတယ်။ "အင်း ဒီ မြည်းတော့ သင်ခန်းစာ ကောင်းကောင်း ပေးဖို့ လိုနေပြီပဲ" လို့ သခင်ဖြစ်သူက တွေးလိုက်မိတယ်။ နောက်တနေ့ နံနက်မှာ အစေခံ တယောက်က နွားကို လာထုတ်သွားပြီး လယ်ထွန်ဖို့ ခေါ်သွားပါတယ်။

လယ်ထဲ အရောက်မှာတော့ နွားက လှဲချလိုက်ပြီး နေမကောင်းချင်ယောင် ဆောင်ပါတယ်။ ဒီတော့ အစေခံက သခင်ဆီ သွားပြီး အကြောင်းစုံ ပြောပြပါတယ်။ ဒါတွေကို သိပြီးသား ဖြစ်တဲ့ သခင်ဖြစ်သူက

"အေး ဒါဆို နွားကို အနားပေးပြီး မြည်းနဲ့ လယ်ထွန်လိုက်" လို့ ခိုင်းပါတယ်။

အစေခံလည်း သခင်ခိုင်းတဲ့ အတိုင်း နွားနေရာမှာ မြည်းကို အစားထိုးလို့ တနေ့လုံး လယ်ထွန်ပါတယ်။ သူ့မိတ်ဆွေကို ကူညီချင်တဲ့ မြည်းဟာ နွားလုပ်ရမယ့် အလုပ်တွေကို လုပ်ရ ပါတော့တယ်။ ညနေချမ်း ရောက်တော့ မြည်းဟာ ပြန်လာပါတယ်။

သူ့စိတ်တွေက နောက်ကျိနေပြီး သူ့ခြေထောက်တွေဟာ ခွေယိုင်နေပါပြီ။ ပခုံးကလည်း ထမ်းပိုးကို ထမ်းရတာကြောင့် နာကျင်ကိုက်ခဲ နေပါပြီ။ နွားကို အကြံပေးမိတဲ့ အတွက် သူဟာ ကိုယ့်ကိုယ်ကို ဒေါသတွေထွက် နောင်တတွေလည်း ရနေပါပြီ။

ဒီအချိန်မှာ သခင်လုပ်သူက ခြံထဲကို လာပြီး တိတ်တိတ်လေး နားထောင်ပြန် ပါတယ်။ မြည်းကို မြင်တော့ နွားက အားရ ဝမ်းသာနဲ့ ပြောပါသတဲ့။

"မင်းကတော့ တကယ့် မိတ်ဆွေကောင်း ပါကွာ။ မင်းအကြံပေးလို့ ဒီနေ့ ငါ နားနားနေနေ နေရတယ်။ ကျေးဇူးတင် လိုက်တာကွာ။ မနက်ဖြန်လည်း ငါဒီလို ထပ်လုပ်အုံးမယ်"

အဲဒီအခါမှာ မြည်းက ပြောပါတယ်။ "ငါက အခြားသူတွေလို စိတ်သဘောထား ကောင်းကောင်း မွန်မွန်နဲ့ မိတ်ဆွေ သူငယ်ချင်းကို အကူအညီ ပေးချင်တဲ့ သူပါ။ ဒါပေမယ့်လည်း နောက်ဆုံးတော့ မင်းလုပ်ရမယ့် အလုပ်တွေက ငါ့အပေါ် ပုံကျလာတယ်။

မနက်ဖြန်တော့ မင်း လုပ်နေကျ အတိုင်း လယ်ဆက်ထွန်ဖို့ လိုလိမ့်မယ်။ သခင်က အစေခံကို ပြောနေတာ ငါကြားရတယ်။ မင်းထပ်ပြီး နေမကောင်း ဖြစ်နေအုံးမယ် ဆိုရင်တော့ သားသတ်ရုံကို ပို့ရလိမ့်မယ် လို့ ပြောတယ်။

ဘာဖြစ်လို့လဲ ဆိုတော့ မင်းက ငပျင်းတကောင် ဖြစ်နေလို့ပဲ" တဲ့။ အဲဒီနောက်တော့ မိတ်ဆွေ နှစ်ဦးဟာ တဦးကို တဦး စကား မပြောကြ တော့ပါဘူး။ တသက်လုံးလည်း မိတ်ဆွေ ပြန်မဖြစ်တော့ ပါဘူး။

တကယ်လို့ သင်ဟာ တယောက်ယောက်ကို ကူညီချင်တယ် ဆိုရင်တောင် အဲဒီ ဝန်ထုပ်ဝန်ပိုးဟာ သင့်အပေါ်ကို ကျမလာ ပါစေနဲ့။ Crd

Post a Comment

0 Comments