မွေးကင်းစကလေးလေးတွေ ဗိုက်ဆာနေလား၊ ဗိုက်ပြည့်နေလားဆိုတာကို သိနိုင်မယ့်အချက်များ

မိဘတွေက ကလေးတွေ အချိန်အကြာကြီး ဗိုက်ဆာနေမှာ၊ ဗိုက်မပြည့်မှာကို အလွန်အမင်း စိုးရိမ်တတ်ကြပါတယ်။ ကလေးတွေက ဗိုက်ပြည့်လား၊ မပြည့်လားဆိုတာကို လက်ဟန်အမူအရာနဲ့ ပြတတ်ကြပါတယ်။ အဓိကကတော့ ကလေးတွေပြတတ်တဲ့ အမူအရာကို နားလည်ထားရင် အဆင်ပြေသွားမှာပါ။

မွေးကင်းစကလေးလေး ဗိုက်ဆာနေတာကို ဘယ်လိုသိနိုင်မလဲ။

ကလေးလေးတွေက စကားမပြောတတ်ခင်မှာ ခြေဟန်လက်ဟန်နဲ့ မိဘတွေကို ဆက်သွယ်တတ်ကြပါတယ်။ သူတို့ဗိုက်ဆာနေရင်လည်း အမူအရာလေးနဲ့ ဖော်ပြကြပါတယ်။

- လက်ချောင်းလေးတွေကို စုပ်နေခြင်း

- ခေါင်းကို ဟိုစောင်းဒီစောင်းလုပ်ပြီး မိခင်နို့ သို့မဟုတ် နို့ဘူးကို ရှာနေခြင်း

- နှုတ်ခမ်းကို လျှာနဲ့ သပ်နေခြင်း၊ နှုတ်ခမ်းကို လက်ဝါးနဲ့ရိုက်နေခြင်း

- လက်သီးကို တင်းတင်းကျပ်ကျပ်စုပ်ထားခြင်း

- ပါးစပ်ကို ပွင့်လိုက်၊ ပိတ်လိုက် အကြိမ်ကြိမ်ပြုလုပ်ခြင်း

- ကလေးကို ချီထားတဲ့အချိန်မှာ မိခင်ရဲ့ရင်ခွင်ထဲကို ခေါင်းထိုးဝင်ခြင်း

- အချိန်အကြာကြီးအိပ်တာမဟုတ်ဘဲ နိုးကြားနေခြင်း

- ခြေထောက်ကို မြှောက်ခြင်း

- လူးလွန့်နေခြင်း

စတဲ့အမူအရာတွေက ကလေးတွေ ဗိုက်ဆာနေကြောင်း မိဘတွေကို ပြောပြနေတဲ့ အမူအရာတွေပါပဲ။

ကလေးတွေကို နို့မဝမချင်း နို့တိုက်ဖို့ကတော့ အရေးအကြီးဆုံးပါပဲ။ ကလေးလေးတွေ ဗိုက်ပြည့်သွားပြီဆိုရင်လည်း အမူအရာလေးတွေနဲ့ ဖော်ပြတတ်ကြပါတယ်။

- မိခင်ရဲ့နို့ကို ဖယ်လိုက်ခြင်း

- မလူးလွန့်တော့ဘဲ ငြိမ်သွားခြင်း

- လက်ကို မစုပ်တော့ဘဲ အနားယူသွားခြင်း စတဲ့အမူအရာတွေကို ပြတတ်ပါတယ်။

သင့်ရဲ့ကလေးလေး ဗိုက်ပြည့်လား မပြည့်လားဆိုတာ မကွဲပြားဘူးဆိုရင် သူတို့ကို လေထုတ်ပေးလိုက်ပါ။ ပြီးတော့ နောက်ထပ် နို့တိုက်တာ သို့မဟုတ် နို့ဘူးတိုက်တာကို ပြုလုပ်ပါ။ ဗိုက်ပြည့်သွားတဲ့ ကလေးက ထပ်ပြီး နို့စို့ဖို့ စိတ်မဝင်စားတော့ပါဘူး။