ဧကရာဇ်နှင့် သူတောင်းစား

လူဆိုသည်မှာ ရည်မှန်းချက် ကြီးမားရမည်ဟု ဆိုပါသည်။ သို့သော် ရည်မှန်းချက် အကြီးဆုံး သူများသည် လောကတွင် မပျော်ရွှင်ဆုံး သူတွေ ဖြစ်သည် ဟုလည်း ဆိုကြသည်။ ဥပမာ အလက်ဇန္ဒားကို ကြည့်ပါ။

တကမ္ဘာလုံးကို သိမ်းပိုက် စိုးမိုးမည် ဆိုကာ အားထုတ်ခဲ့သည်။ သို့သော် သူသည် မပျော်ရွှင်သည့်သူ တဦး ဖြစ်ခဲ့ရသည်။

ထို့ကြောင့်လည်း သူသည် သူတောင်းစား တဦးကိုကြည့်ပြီး အားကျကာ မနာလို ဖြစ်ခဲ့ရသည် ဟု ဆိုသည်။ သူအားကျပြီး မနာလို ဖြစ်ခဲ့ရသော သူတောင်းစားမှာ ဒိုင်ဩဂျီးနိစ် ဖြစ်သည်။ အဘယ်ကြောင့် ဒိုင်ဩဂျီးနိစ်ကို သူတောင်းစားဟု ပြောရသနည်း။ တောင်းစား နေသောကြောင့် ဖြစ်သည်။

တွေးခေါ် ပညာရှင်ကြီးတဦး ဖြစ်သော်လည်း သူ့ခံယူချက်နှင့် သူ ခွက်စွဲကာ တောင်းစားသည်။ လောကကြီးတွင် ဘာကိုမျှ မက်မော တွယ်တာစရာ မရှိ ဟုဆိုကာ သူ့ကိုယ်တွင် ဘာအဝတ်မျှ မဝတ်၊ ဝတ်လစ်စားလစ် နေထိုင်သူလည်း ဖြစ်သည်။

တနေ့တွင် ဒိုင်ဩဂျီးနိစ်သည် ဆာလောင်လာ သဖြင့် ခွက်ဆွဲကာ မြစ်ကမ်းပါးအတိုင်း လျှောက်လာသည်။ သူက ရေငတ်သဖြင့် မြစ်ထဲ ဆင်းကာ ခွက်နှင့် ရေခပ်သောက်လိုက် သေးသည်။ သူက မြစ်ထဲ ဆင်းကာ ရေသောက်နေစဉ် ခွေးတကောင်ကလည်း မြစ်ထဲ ဆင်းပြီး ရေလာသောက်သည်။

ဒိုင်ဩဂျီးနိစ်က ခွေးကို ငေးကြည့်နေ မိသည်။ သူ့စိတ်ထဲတွင် ခွေးကို ကြည့်ပြီး တွေးနေမိသည်မှာ "ဪ ဒီခွေးက ငါ့ထက်တောင် လွတ်လပ်သည်။ သူ့က ဘာခွက်မျှ ယူမလာ။ သူတောင် ခွက်မရှိဘဲ ရေသောက် နိုင်လျှင် ငါကရော အဘယ်ကြောင့် ခွက်မရှိဘဲ မသောက်နိုင်ရ မည်နည်း။

ဤခွက်သည် ငါ၏ တခုတည်းသော ပိုင်ဆိုင်မှု ဖြစ်သည်။ သူရှိနေသောကြောင့် ပျောက်မှာကို ပူပန်ရသည်။ ခိုးမှာကို ကြောက်နေရသည်။ ခွက်ကို ထားခဲ့လျှင် သူများ ယူသွားမည်ကို စိုးရိမ်သဖြင့် သွားလေရာ ယူသွားနေရသည်။ ဝဋ်ဒုက္ခ ကြီးပေစွ။ သွားဟ"

ဒိုင်ဩဂျီးနိစ်က သူ့လက်ထဲက ခွက်ကို မြစ်ထဲ လွှင့်ပစ်လိုက်သည်။ ထို့နောက် ခွေးကို ဦးညွတ်လိုက်ကာ "ကျေးဇူးတင်ပါတယ် ငါ့ကောင်ရာ။ မင်းကြောင့် ငါအမြင်မှန် ရသွားပြီ" ဟု ဆိုလိုက်သည်။ သူတို့အဖြစ်ကို မြစ်ကမ်းပေါ်က ကြည့်နေသည့် အလက်ဇန္ဒားက အတော်လေး မနာလို ဖြစ်သွားကာ

"အချင်း ဒိုင်ဩဂျီးနိစ် အားကျလိုက်ပါဘိ။ အကယ်၍သာ ဘုရားသခင်က ငါ့အား နောက်ဘဝတွင် ပြန်လည် မွေးဖွားစေမည် ဆိုလျှင် ငါ့ကို ဒိုင်ဩဂျီးနိစ် အဖြစ် ထပ်မံ မွေးဖွားပေးရန်နှင့် အလက်ဇန္ဒား အဖြစ် ပြန်လည် မမွေးဖွားရန် တောင်းဆိုမိမည်" ဟုဆိုလိုက်သည်။

ဒိုင်ဩဂျီးနိစ်က အလက်ဇန္ဒား စကားကို ကြားလျှင် ခွက်ထိုးခွက်လန် ရယ်တော့သည်။ ထို့နောက် ခွေးကို သူ့အနီးသို့ ခေါ်ကာ "ဟေ့ကောင်ရေ ဤသူကား မည်မျှ ပေါက်ကရ ပြောသလဲ ဆိုတာ ကြည့်လော့။ နောက်ဘဝတွင် သူက ဒိုင်ဩဂျီးနိစ် ဖြစ်ချင်သေးသတဲ့။

ဘာလဲကွယ့် နောက်ဘဝ။ ဘာကြောင့် နောက်ဘဝ ဆိုပြီး ရွှေ့နေသေးလဲ။ နောက်ဘဝ ဆိုတာ ဘယ်လောက် ရေရာ သေချာလို့လဲ။ ခု လက်ရှိ ဘဝလောက် သေချာ ရေရာတာ ဘာရှိသေးလဲ ကွယ်တို့။ ဟေ့ ဘုရင် ဆိုတဲ့ကောင် ဒိုင်ဩဂျီးနိစ်လို ဖြစ်ချင်တာများ ဘာကြောင့် နောက်ဘဝကို စောင့်နေသလဲ။ ခုဖြစ်လို့ ရတာပဲ။

သင့်ကိုယ်မှာ ဝတ်ထားတဲ့ အဝတ်တွေ ချွတ်ပစ်လိုက်၊ မြစ်ထဲကို မျှောပစ်လိုက်။ သင်အောင်နိုင်ခဲ့တာတွေ အားလုံးကို မေ့ထားလိုက်။ သင်ပိုင်ဆိုင် ခဲ့တာတွေဟာ ဘာတခုမျှ သုံးစားမရဘူးလို့ မှတ်လိုက်" "ဒိုင်ဩဂျီးနိစ်၊ အပြော လွယ်သော်လည်း ယခုအချိန်တွင် စွန့်ပစ်ရန် ခက်လှသည်"

"ကျွန်ုပ်လို ဖြစ်ချင်တာများ ဟောဒီလို သဲသောင်မှာ လှဲချလိုက်။ ပိုင်ဆိုင်တာတွေ စွန့်ပစ်လိုက်။ နေပူဆာ လှန်းလိုက်" ဒိုင်ဩဂျီးနိစ်က ပြောပြောဆိုဆိုနှင့် သောင်ပြင်ပေါ် ပစ်လှဲလိုက်သည်။

သို့သော် အလက်ဇန္ဒားက "အချင်း ဒိုင်ဩဂျီးနိစ် သင်၏ ဖိတ်ခေါ်မှုအား ကျေးဇူးတင်ပါ၏။ သို့သော် ယခုဘဝ တွင်တော့ သင့်လို နေထိုင်ရန်မှာ မဖြစ်သေး။ နောက်ဘဝတွင်သာ သင့်လို နေထိုင်ပါမည်"

ဒိုင်ဩဂျီးနိစ်က အလက်ဇန္ဒားကို မေးသည်။ "သင့်ကို တခုလောက် မေးပါရစေ" "မေးလော့" "တကမ္ဘာလုံးကို သိမ်းပိုက် စိုးမိုးပြီးလျှင် သင်ဘာလုပ်မည်နည်း" "ကျွန်ုပ် အနားယူပါမည်" "အတော် သောက်သုံးမကျတဲ့ အတွေးပဲ။ ခုလည်း ငါ့လို နားချင် နားလိုက် စားချင်မှ ထစားလိုက် လုပ်နိုင်တာပဲ မဟုတ်လား"

အလက်ဇန္ဒားကား ဒိုင်ဩဂျီးနိစ်ကို အားကျသော်လည်း ဘာမျှ ဆက်မပြောနိုင် တော့ပါ။ သူ့လမ်းကို သူဆက်လျှောက် သွားသည်။ ဒိုင်ဩဂျီးနိစ် ကလည်း ခွေးကို ခေါ်ကာ တောင်းစားရန် ထွက်သွားသည်။

သူတို့နှစ်ယောက်၏ လာရာလည်း မတူ၊ လားရာလည်း မတူ၊ ပျော်ရွှင်ပုံခြင်းလည်း မတူ၊ စိတ်ချမ်းသာပုံ ခြင်းလည်း မတူ။ တဦးက တောင်းစားသည်၊ တဦးက တိုက်ခိုက်စားသည်။

သူတောင်းစားက စိတ်ချမ်းသာပြီး၊ တိုက်ခိုက်စားသူ ကတော့ စိတ်ဆင်းရဲစွာဖြင့် နေထိုင်နေ ရသည်။ (Ref: Beggar and Conqueror) တင်ညွန့် ၁၀.၄.၂၀၂၂

Post a Comment

0 Comments