ကြိုးစင်နှင့် ဓားစက်

မိုးတလုံး လေတလုံး ပြောတတ်သူသည် ကြိုးစင်တွင် ဒုက္ခ ရောက်ရသည်။ နပိုလီယံ ကောင်းစားစဉ်က ဖြစ်သည်။ နပိုလီယံတပ်က အခြားနိုင်ငံကို ကျူးကျော်စဉ် အပြစ်သား တယောက်ကို တရားစီရင်ရန် သူ့ထံကို ဖမ်းခေါ်လာသည်။

ထိုသူကား ဓားပြအဆင့်လောက် ဖြစ်ပြီး ရက်စက်စွာ လူသတ် လုယက် နေသူလည်း ဖြစ်သည်။ "မောင်မင်း အပြစ်ရှိသလား" "မရှိ" "အဘယ်ကြောင့်နည်း" "ငါသည် ငါ့နိုင်ငံတွင် တိုက်ခိုက် လုယက်ခြင်း ဖြစ်သည်။ သင့်နိုင်ငံတွင် မဟုတ်"

"ယခုအခါ သင့်နိုင်ငံကို ငါတို့ သိမ်းပိုက် ထားသည်ကို သိပါ၏လော။ ငါတို့သည် သင့်ကို တရားစီရင်ခွင့် ရှိသည်ကို သိပါ၏လော" "ကြိုက်သလို စီရင်လေ" "သင်ကျူးလွန် ထားသော အပြစ်တို့ အတွက် သေဒဏ်မှ လွဲပြီး အခြားမရှိ"

ထိုဓားပြဗိုလ်ကြီးကို သေဒဏ် စီရင်သည်။ သေဒဏ် စီရင်ပွဲကို လူစည်ကားရာ ရင်ပြင်တွင် ပြုလုပ်သည်။ ပြည်သူတွေ ကလည်း ဝမ်းသာစွာဖြင့် တိုးဝှေ့ ကြည့်ကြသည်။ သတ်မှတ်ချိန်တွင် ရာဇဝတ်သားကို ခေါ်လာသည်။

ရာဇဝတ်သားကို ကြိုးစင် တင်သည်။ လူတွေက ဝမ်းသာစွာ အော်ဟစ်ကြသည်။ "သတ်ပစ် သတ်ပစ်" နောက်ဆုံးတွင် ဆရာတော်တပါးက ရွတ်ဖတ်ပေးပြီး အာဏာပါးကွက်သားကို အရာရှိ တဦးက အချက်ပြ လိုက်ရာ ကြိုးစင်ဒေါက်ကို ဖြုတ်ချလိုက်တော့သည်။

"ဟာ" လူအုပ်ကြီးက ဟာခနဲ ဖြစ်သွားသည်။ အဘယ်ကြောင့် ဆိုသော် ကြိုးက ပြတ်သွားသောကြောင့် ဖြစ်သည်။ ဓားပြကြီးက ကြိုးစင်ပေါ် ပြန်တက် လာသည်။ "ဟား ဟား ဟား၊ မင်းတို့ ပြင်သစ်တွေ ကြိုးတချောင်းတောင် ခိုင်အောင် မလုပ်နိုင် ပဲနဲ့များ ငါ့ကို ကြိုးစင် တင်သတဲ့လားကွ ဟား ဟား"

ဥပဒေအရ ဆိုလျှင် ထိုရာဇဝတ်သားကို ကြိုးစင်တွင် နှစ်ကြိမ် သတ်ခွင့်မရှိ။ ထိုသူကို အပြစ်က ကင်းလွတ်ခွင့် ပေးကြောင်း နပိုလီယံက လက်မှတ် ရေးထိုးပေးရမည် ဖြစ်သည်။ အရာရှိက နပိုလီယံထံ ရောက်လာပြီး အလေးပြုသည်။

"ဘာလဲဟေ့" "ကြိုးဒဏ် ချခံထားရတဲ့ ရာဇဝတ်သား လွတ်သွားပါပြီ" "ဘာဖြစ်လို့လဲကွ" "ကြိုးပြတ်ကျ သွားလို့ပါ" "ဟာ ခက်တော့တာပဲ။ အဲဒီတော့" "ဥပဒေအရ ဆိုရင် သူ့ကို ကြိုးနဲ့ နှစ်ကြိမ် မသတ်နိုင်ပါ။ ဒါကြောင့် လွှတ်ပေးဖို့ လက်မှတ် လာထိုးတာပါ"

"ကောင်းပြီလေ အဲဒီကောင် ဘာပြောသေးလဲ" "မင်းတို့ ပြင်သစ်က ကြိုးတောင် ကောင်းကောင်း မလုပ်နိုင်ဘူးလို့ လှောင်ပြောင် ပါတယ်"

"ဟုတ်လား။ အေးလေ ပြင်သစ်တွေ ကြိုးကောင်းကောင်း မလုပ်နိုင်ပေမဲ့ ဓားကောင်းကောင်း လုပ်နိုင်တယ် ဆိုတာ ပြရသေးတာပေါ့။ သူ့ကို ကြိုးဒဏ် နှစ်ကြိမ် ပေးလို့ မရရင် နောက်တကြိမ်ကို ခေါင်းဖြတ်စက်ထဲ ထည့်လိုက်ပေါ့ကွာ"

ရာဇဝတ်သားမှာက ကြိုးဒဏ်က လွတ်သွားသော်လည်း ဓားစက်ဖြင့် နောက်တကြိမ် စီရင်ရာ ခေါင်းပြတ်သွား ရပါတော့သည်။ ထို့ကြောင့် ကြိုးစင်က လွတ်သော် ငြိမ်နေလိုက်လျှင် ရှင်ကောင်း ရှင်နိုင်သည်။

အပြောမတတ်သဖြင့် အရှိုက်ထိ သွားသူက ဓားစက်ဖြင့် စီရင်သောကြောင့် သေရသည်။ ကြိုးစင်ထက် ဓားစက်က ပိုပြီး စိတ်ချရသည့် သဘော ရှိသည်။ (Ref: Say Less than Necessary ကို မြန်မာမှုပြုသည်) တင်ညွန့် ၁၉.၃.၂၀၂၂