ဈေးအကြီးဆုံး ပစ္စည်း

တခါတုန်းက ဘုရင့်သားနှင့် အမတ်ကြီးသည် နိုင်ငံရပ်ခြားမှ လာသော ကုန်သည်များရဲ့ ဈေးသို့ သွားကြည့် ကြသည်။ မမြင်ဘူး မတွေ့ဘူးသော ပစ္စည်းများကား ပြည့်နှက်နေ သဖြင့် မင်းသားကား အရာအားလုံးကို ထူးဆန်းစွာ လိုက်ကြည့် နေ၏။

ကျောက်သံပတ္တမြားနှင့် လက်ဝတ်ရတနာ များပါ ရောင်းချနေသည်ကို တွေ့သော် မင်းသားက အမတ်ကြီးအား မေး၏။ "အမတ်ကြီး လောကတွင် ဈေးအကြီးဆုံး အရာကား မည်သည့်အရာ ဖြစ်သနည်း"

အမတ်ကြီးက "အရှင့်သား ရွှေငွေပစ္စည်း များစွာ တို့သည် အခကြေးငွေ ပေးပြီး ဝယ်ယူလို့ ရ၏။ အချိန်ကား အခကြေးငွေ ပေး၍ ဝယ်ယူ၍ မရ။ ထို့ကြောင့် အချိန်ကား ဈေးကြီး ပေသည်"

ဘုရင့်သားက "ထို့ထက် ဈေးကြီးတာ ရှိသေးသလော"

"ရှိပါသည် အရှင့်သား လောကတွင် ဈေးအကြီးဆုံး အရာကား ယုံကြည်မှု ဖြစ်ပေသည်။ ယုံကြည်မှု ဆိုသည်မှာ ဈေးကြီးလှ စွာသော အချိန်များစွာကို သုံးပြီးမှ ရရှိတတ်၏။

ယုံကြည်မှု ဆိုသည်မှာ သစ်ပင်နှင့် တူ၏။ အချိန်ပေး၍ ရေလောင်း ရ၏။ ပြုစု ရ၏။ ကြီးထွား လာဖို့ကို နှစ်ပေါင်း များစွာ စောင့်ရ၏။

ယုံကြည်မှု သည်လည်း ထိုနည်း လည်းကောင်း ဖြစ်ပေသည်။ လူတယောက်နဲ့ တယောက် ယုံကြည်မှု ရဖို့ နှစ်ပေါင်းများစွာ ပေါင်းဖက် နေထိုင်မှသာ ရရှိပေသည်။

သို့ပေမယ့် နှစ်ပေါင်းများစွာ ပြုစုလာတဲ့ သစ်ပင်ကို ခုတ်ပစ်ဖို့မှာ နေ့တပိုင်း မျှပင် အချိန် မကုန်ပေ။ လူတယောက်နဲ့ အနှစ်နှစ် အလလ ဆောက်တည် ထားတဲ့ ယုံကြည်မှုကို စကားတခွန်း ဖြင့်ပင် ဖျက်ဆီးပစ် နိုင်သည်။

ထို့ကြောင့် ယုံကြည်မှုကား ဈေးအကြီးဆုံး ဖြစ်ပေသည်။ အရှင့်သား ချစ်သူခင်သူ၊ လင်မယား အချင်းချင်း၊ လုပ်ဖော် ကိုင်ဖက်၊ မောင်နှမ အချင်းချင်း ဝေးကွာရခြင်း၏ အကြောင်းသည် ယုံကြည်မှုကို အခြေခံလေသည်။

မလိုသူရဲ့ စကားတခွန်းကြောင့် ထိုယုံကြည်မှုကို ပျက်ပြယ်နိုင်ပေသည်။ ထို့ကြောင့် အနှစ်နှစ် အလလ တည်ဆောက်ထားတဲ့ ယုံကြည်မှုကိုသာ မပျောက်ပျက်အောင် ဉာဏ်နှင့် ယှဉ်၍ စောင့်ထိန်းလော့"

Crd Mg Sai, phoomyatchal

Post a Comment

0 Comments