ဘဝကို တန်ဖိုးထားတတ်ပါစေ

တနေ့မှာ လူငယ်လေး တဦးဟာ အဖိုးဖြစ်သူ အနားကို သွားပြီး "ဘဝတန်ဖိုး ဆိုတာ ဘာလဲ အဖိုး" ဆိုပြီး မေးလိုက်တယ်။ အဲဒါနဲ့ အဖိုးဖြစ်သူလည်း ကျောက်တုံး တတုံးကို လူငယ် လက်ထဲ ထည့်ပေးလိုက်ပြီး "ကဲ ဒီကျောက်တုံးရဲ့ တန်ဖိုးဟာ ဘယ်လောက် ရှိလဲ ဆိုတာ သွားစုံစမ်း ခဲ့ချေ။ ဒါပေမဲ့ ရောင်းတော့ မရောင်းခဲ့နဲ့ နော်" ဆိုပြီး မှာလိုက်တယ်။

လူငယ်လည်း အဖိုး ပေးလိုက်တဲ့ ကျောက်တုံးကို ယူပြီး ထွက်သွား လိုက်တယ်။ လမ်းမှာ လိမ္မော်သီးရောင်းတဲ့ ဆိုင်တဆိုင်ကို တွေ့တော့ အထဲဝင်ပြီး ကျောက်ရဲ့ တန်ဖိုးကို မေးလိုက်တယ်။ ဈေးသည်က "ဒီကျောက်တုံး ဆိုရင် လိမ္မော်သီး ၁၂ လုံးတော့ ရမယ် ယူမှာလား" ဆိုပြီး ဈေးဖြတ် လိုက်တယ်။ လူငယ်လည်း အဖိုးဖြစ်သူက မရောင်းနဲ့လို့ မှာထားတဲ့ အတွက် ဈေးသည်ကို တောင်းပန်ပြီး ပြန်ထွက်လာခဲ့တယ်။

ဆက်သွားပြီး မကြာခင် ဟင်းသီးဟင်းရွက် ရောင်းတဲ့ ဆိုင်တဆိုင်ကို တွေ့ပြီး အထက်ပါ အတိုင်း ဈေးသည်ကို ကျောက်တုံးရဲ့တန်ဖိုးကို မေးလိုက်တယ်။ ဈေးသည်လည်း ပြောင်လက်နေတဲ့ ကျောက်တုံးကို ကြည့်ပြီး "ကျောက်တုံးပေးရင် အာလူး တအိတ် ရမယ်" ဆိုပြီး လူငယ်ကို ပြောလိုက်တယ်။ လူငယ်လည်း မရောင်းသေးဘူး ဆိုတဲ့ အကြောင်း တောင်းပန်ပြောဆိုပြီး ပြန်ထွက်လာ ခဲ့တယ်။

ရှေ့နားမှာ လက်ဝတ်ရတနာ အရောင်းဆိုင် တဆိုင်ကို တွေ့ပြီး ကျောက်တန်ဖိုးကို ဝင်မေးလိုက် ပြန်တယ်။ ဆိုင်ရှင်လည်း ကျောက်တုံးကို မှန်ဘီလူးနဲ့ တချက် ကြည့်လိုက်ပြီး "ဒေါ်လာ ၁၀ သန်း ပေးမယ်" ဆိုပြီး လူငယ်ကို ကမ်းလှမ်း လိုက်တယ်။ လူငယ်လည်း ခေါင်းခါပြီး မရောင်းနိုင် သေးဘူး ဆိုတဲ့ အကြောင်း ရှင်းပြ တောင်းပန်ကာ ဆိုင်ထဲကနေ ပြန်ထွက်လာ ခဲ့တယ်။

ဒီလိုနဲ့ ရှေ့ကို ဆက်ပြီး သွားလိုက်တဲ့ အခါ မှာတော့ အဖိုးတန် ကျောက်မျက် ရတနာတွေ ရောင်းဝယ်တဲ့ ဆိုင်ကြီး တဆိုင်ကို တွေ့လိုက်တယ်။ လူငယ်လည်း အလားတူပဲ ကျောက်ရဲ့ တန်ဖိုးကို ဝင်မေးလိုက်တယ်။

ဆိုင်ပိုင်ရှင်က တောက်ပြောင်နေတဲ့ ပတ္တမြားကြီးကို တွေ့လိုက်တဲ့ အခါမှာ အဝတ်အနီစ တခုကို ဖြန့်ခင်းလိုက်ပြီး အပေါ်မှာ တင်လိုက်တယ်။ ကျောက်တုံး ဘေးပတ်လည်ကို လှည့်ပတ်ကြည့် လိုက်တယ်။

ပြီးတော့ ခါးကို ကိုင်းကာ ကျောက်တုံးကို သေသေချာချာ စိုက်ကြည့်ရင်း "ဒီ အဖိုး မဖြတ်နိုင်တဲ့ ပတ္တမြားကြီးကို ဘယ်ကနေ ရလာတာလဲ" လို့ လူငယ်ကို မေးလိုက်ပြီး "ကမ္ဘာကြီး တခုလုံးကို ရောင်းပြီးတော့ ဝယ်မယ် ဆိုရင်တောင် ဒီလောက် တန်ဖိုးကြီးတဲ့ ပတ္တမြားကြီးကို ဝယ်နိုင်မှာ မဟုတ်ဘူး" လို့ တအံ့တသြ ပြောလိုက်တယ်။ လူငယ်လေးလည်း နားမလည် နိုင်အောင် ဖြစ်ကာ ကြက်သေ သေပြီး အဖိုးဖြစ်သူထံ ပြန်လာခဲ့ လိုက်တယ်။

အဖိုးကို သူကြုံတွေ့ ခဲ့ရတာတွေကို ပြောပြပြီး တဲ့နောက် "ကဲ အခု အဖိုးက ကျနော့ကို ဘဝတန်ဖိုး ဆိုတာ ဘာလဲ ရှင်းပြပေတော့" လို့ ပြောလိုက်တယ်။ အဲဒါနဲ့ အဖိုးဖြစ်သူက "ဘဝတန်ဖိုးက ဘာလဲ ဆိုတာ ငါ့မြေး သွားခဲ့တဲ့ လိမ္မော်သီးဆိုင်၊ ဟင်းသီး ဟင်းရွက်ဆိုင်၊ လက်ဝတ် ရတနာဆိုင်နဲ့ အဖိုးတန် ကျောက်မျက် ရတနာတွေ ရောင်းဝယ်တဲ့ ဆိုင်တွေက အဖြေပေးခဲ့ပြီ မဟုတ်လား။

ငါ့မြေးဟာ ဒီလို အဖိုး မဖြတ်နိုင်တဲ့ ကျောက်တုံးတတုံး ဖြစ်ကောင်း ဖြစ်မယ်။ ဒါပေမဲ့ လူတွေဟာ သူတို့ရဲ့ ငွေကြေး အခြေအနေ၊ ပညာ အရည်အချင်း၊ အသိပညာ အဆင့်အတန်း၊ ယုံကြည်ချက်တွေ သူတို့ ကျင်လည် ဖြတ်သန်းရတဲ့ ဘဝတွေပေါ်မှာ အခြေခံပြီး ငါ့မြေးရဲ့ ဘဝကို တန်ဖိုး ဖြတ်ကြလိမ့်မယ်။

လူတွေဟာ သူတို့ အဆင့်အတန်းနဲ့ ယှဉ်ပြီး အခြားသူတွေရဲ့ ဘဝကို တန်ဖိုး ဖြတ်တတ် ကြတယ်။ ဒါပေမဲ့ မစိုးရိမ်ပါနဲ့။ ငါ့မြေးရဲ့ ဘဝတန်ဖိုး အစစ်အမှန်ကို ထိုးထွင်း သိမြင်နိုင်တဲ့ လူတွေကို ငါ့မြေး ကျိန်းသေပေါက် ရှာတွေ့မှာပါ။ ကိုယ့်ကိုယ်ကို လေးစားမှု ရှိပါ ငါ့မြေးဟာ ငါ့မြေး ပါပဲ"

ဘဝကို တန်ဖိုးထားတတ် ကြပါစေ။ Crd Ko Myo

Post a Comment

0 Comments