အတော်ဆုံး သား

တခါတုန်းက ရွာတရွာမှာ မိန်းမကြီး သုံးယောက်က ရေခပ်လာ ကြပါတယ်။ ရေတွင်းမှာ ရေခပ်ကြရင်း သူမတို့ရဲ့ သားတယောက်ချင်းကို ချီးမွမ်း ပြောဆို ကြပါတယ်။

ပထမမိန်းမကြီးက သူ့သားက အလွန် အပြေး မြန်ကြောင်း၊ သူနဲ့သာ ပြိုင်မယ်ဆိုရင် အကုန်လုံး ရှုံးကြမယ် ဆိုတဲ့ အကြောင်း ပြောရင်း သူ့သား အကြောင်းကို သူဂုဏ်ယူစွာနဲ့ အခြားသော မိန်းမကြီး နှစ်ယောက်ကို ပြောပြ နေပါတယ်။

ဒုတိယ မိန်းမကြီးကတော့ သူ့သားရဲ့ အသံက ဘယ်လောက် ကောင်းကြောင်း၊ ဒီရွာမှာ သူ့သားရဲ့ အသံလောက် ဘယ်သူမှ နားထောင် ကောင်းအောင် သီချင်းတပုဒ်လုံး သီဆိုနိုင်မှာ မဟုတ်ကြောင်း ကျန်မိန်းမကြီးတွေကို ပြောပြပါတယ်။

တတိယ မိန်းမကြီးကတော့ ဘာမှ မပြောဘဲ ပြုံးလို့သာ နားထောင် နေပါတယ်။ ထိုမိန်းမကြီး သုံးယောက်ရဲ့ အနီးအနားမှာ တောင်ဝှေး တချောင်းနဲ့ အဖိုးအို တယောက် ခရီးတထောက် နားနေပါတယ်။ ထိုမိန်းမ ကြီး သုံးယောက်ရဲ့ စကားတွေ ကိုလည်း အဖိုးအိုက အစအဆုံး ကြားနေခဲ့ ပါတယ်။

မကြာခင်မှာဘဲ ရေအိုးကိုယ်စီ ရွက်လို့ မိန်းမကြီး သုံးယောက်က လာလမ်းအတိုင်း အိမ်ကို ပြန်လာကြပါတယ်။ ထိုမိန်းမကြီး သုံးယောက်နောက် ကနေ အဖိုးအိုကလည်း ဖြေးညင်းစွာ လမ်းလျှောက်ရင်း လိုက်ပါလာ ခဲ့ပါတယ်။

လမ်းတဝက်ခန့် အရောက်မှာတော့ မိန်းမကြီး သုံးယောက်က ရေအိုးရွက်ရတာ လေးလာတဲ့ အတွက် ခဏတဖြုတ် နားကြပါတယ်။ ထိုအချိန်မှာ ရွာထဲဘက်မှ ကလေးသုံးယောက် ပြေးထွက်လာ ကြပါတယ်။ ပထမမိန်းမကြီးရဲ့ ကလေးက မိခင်အနား ရောက်တဲ့အခါ သံခွေလိမ့်ရင်း ပြေးကစား နေပါတယ်။

ဒုတိယမိန်းမကြီးရဲ့ ကလေးကတော့ သာယာချိုမြိန်တဲ့ အသံနဲ့ သီချင်းတပုဒ်ကို ကောင်းမွန်စွာ သီဆိုရင်း အမေ ရှိရာဆီ ဖြေးညင်းစွာ လမ်းလျှောက်လာ နေပါတယ်။ တတိယမိန်းမကြီးရဲ့ ကလေးကတော့ အမေရှိရာသို့ ပြေးလာပြီး အမေ ချထားသော ရေအိုးကို ကောက်ယူ သယ်ဆောင်ကာ ရွာထဲကို ပြန်သွားပါတော့တယ်။

ပထမမိန်းမကြီးနဲ့ ဒုတိယမိန်းမကြီးက အဖိုးအိုဘက်ကို လှည့်ပြီး သူတို့သားများ ဘယ်လောက် တော်ကြောင်း ပြောဖို့အတွက် စကားပြင်တဲ့ အနေနဲ့ "အဘရေ ကျွန်မတို့ သားများ တွေ့လိုက်ပါသလား" ဆိုပြီး စကားစ ပါတော့တယ်။

ထိုအခါမှာ အဖိုးအိုက "ဘယ်က သားကိုပြောတာလဲ။ ငါတွေ့တာတော့ ရေအိုးကို သယ်ပြီး ရွက်သွားတဲ့ သားလိမ္မာလေး တယောက်သာ တွေ့လိုက်တယ်ကွယ်" ဆိုပြီး တတိယမိန်းမကြီးရဲ့ သားကို ချီးကျူးလိုက် ပါတော့တယ်။

ဒီပုံပြင်လေး ကတော့ ပြင်ပလောကနဲ့ အနီးစပ်ဆုံး ဖြစ်ပါတယ်။ လောကမှာ မိဘတိုင်းက သားသမီးတွေရဲ့ အတော်ဆုံး အရာတွေကို လူတကာ သိအောင် ကြွားချင် ပြောပြချင် ကြပါတယ်။ တကယ်တမ်း အရေးကြီးတာကိုတော့ မေ့နေတတ် ကြပါတယ်။ သားလိမ္မာလေး ဖြစ်အောင် ပျိုးထောင် ပြုစုကြဖို့ပါ။

မိဘကို သိတတ်လိမ္မာတဲ့ သားလိမ္မာလေးမျိုး ဖြစ်ဖို့ကသာ အရေးကြီးပြီး ဘယ်နေရာ ရောက်ရောက် လူရာဝင် ပွဲလယ်တင့်နေမှာ ဖြစ်ပါတယ်။ အဲဒီအတွက် ပျိုးထောင်တဲ့ မိဘတွေမှာလည်း အရေး ကြီးသလို၊ သင်ပေးသမျှ သင်ယူနေတဲ့ သားသမီးမှာလည်း အရေးကြီးပါတယ်။

ဘာပဲဖြစ်ဖြစ် ဒီပုံပြင်လေးက နေပြီး မိမိသားသမီးကို အခြားတတ်သင့်တဲ့ပညာတွေ သင်ပေးသင့်သလိုပဲ မိဘအပေါ် သိတတ်တဲ့ သားလိမ္မာလေး၊ လူယဉ်ကျေးလေး ဖြစ်အောင်လည်း သင်ပေးသင့်တယ် ဆိုတာကို သိလိုက်ရမှာပါ။ BAWA

Post a Comment

0 Comments