လိမ္မာပါးနပ်သော အမတ်ကြီး

အိန္ဒိယနိုင်ငံတွင် ဧကရာဇ် ဆရီကရစ်နာ ဒီဗာရာ အုပ်စိုးခဲ့စဉ်က သူ့မှာ အကြံပေးဝန်ကြီး ရှစ်ယောက် ရှိခဲ့သည်။ တာနီရာမ ဟာလည်း အကြံပေးဝန်ကြီး ရှစ်ဦးထဲက တဦးဖြစ်သည်။ သူဟာ အရမ်း လိမ္မာပါးနပ်ပြီး တာဝန်သိတတ်သူ တဦး ဖြစ်သည်။

ဧကရာဇ်၏ ဥယျာဉ်ထဲတွင် အလွန် အရသာ ကောင်းသော ခရမ်းချဉ်ပင် အချို့ကို စိုက်ပျိုးထားသည်။ ထိုခရမ်းချဉ်ပင်မျိုးသည် အလွန် ရှားပါးပြီး ဧကရာဇ်က အလွန် နှစ်သက်သောကြောင့် ဥယျာဉ်ကို လုံခြုံရေး ထူထပ်စွာ ချထားပြီး ဧကရာဇ်မင်း၏ ခွင့်ပြုချက် မရှိဘဲ မည်သူမှ ဥယျာဉ်ထဲ ဝင်ခွင့်မရပေ။

နွေရာသီ တရက်တွင် ဧကရာဇ်က သူ၏ အကြံပေးများနှင့် ညစာ အတူစားခဲ့ပြီး ခရမ်းချဉ်သီး ဟင်းပွဲကိုလည်း ကျွေးခဲ့သည်။ တာနီရာမဟာ ထိုခရမ်း ချဉ်သီးဟင်းကို အလွန် ကြိုက်နှစ်သက်ခဲ့ပြီး အိမ်ပြန်လာခဲ့သည်။ သို့သော် သူသည် ထိုဟင်းအရသာကို မမေ့နိုင်ပါ။

သူက ဟင်း၏ အရသာကို သူ့ဇနီးအား ပြောပြခဲ့သည်။ တာနီရာမ အပြော ကောင်းသောကြောင့် သူ၏ ဇနီးသည် ကလည်း ခရမ်းချဉ်သီဟင်းကို အလွန် စားချင်လာခဲ့သည်။ သူမက ခရမ်းချဉ်သီး အနည်းငယ် ယူဆောင်လာရန်နှင့် ဟင်းချက်ရန် ပြင်ဆင်ထားမည် ဖြစ်ကြောင်း တာနီရာမကို ပူစာခဲ့သည်။

တာနီရာမမှ ဇနီးသည်အား ဥယျာဉ်တော်ထဲက ခရမ်းပင်များကို ဧကရာဇ်မှ အလွန်အမင်း ဂရုစိုက် စောင့်ရှောက် ထားကြောင်း၊ ခရမ်းချဉ်သီးတလုံး ပျောက်ဆုံးလျှင်ပင် ဧကရာဇ်မှ သိရှိမည် ဖြစ်ကြောင်း၊ ထို့အပြင် ဧကရာဇ်က သူ၏ ဥယျာဉ်တော်အတွင်း ဝင်ရောက်သူအား ပြင်းထန်စွာ အပြစ်ပေးမည် ဖြစ်ကြောင်း ရှင်းပြသည်။

သို့ပေမယ့် တာနီရာမရဲ့ ဇနီးက ဘယ်သူ့ကိုမှ မတိုင်ပင်၊ မပြောဘဲ ဥယျာဉ်တော်ထဲကနေ ခရမ်းသီးတလုံး ယူလာရင် ဘယ်သူမှ သိမှာ မဟုတ်ကြောင်း အတင်းပူစာခဲ့သည်။ တာနီရာမ အနေဖြင့် နားပူ မခံနိုင်သည့် အဆုံး တည၌ ဥယျာဉ်တော်သို့ သွား၍ ဥယျာဉ်တော် ခြံစည်းရိုးကို ကျော်ဝင်ခဲ့သည်။

ကုသိုလ်ကံ ကောင်းလွန်းသောကြောင့် မည်သူ၏ ဖမ်းဆီးမှုမျှ မခံရဘဲ ခရမ်းချဉ်သီး အနည်းငယ် ခူးပြီး အိမ်ပြန်လာ နိုင်ခဲ့သည်။ သူ၏ဇနီးသည်လည်း ခရမ်းချဉ်သီးများကို ချက်ပြုတ်ခဲ့ရာ လက်ရာ ကောင်းသောကြောင့် ဟင်းသည် အလွန်အရသာ ရှိလှသည်။

တာနီရာမရဲ့ ဇနီးဟာ အလွန် အရသာရှိသော ခရမ်းချဉ်သီးဟင်းကို တဦးတည်းသော သားငယ်အား ကျွေးချင်လာသည်။ ဒါပေမယ့် တာနီရာမက "သားကို ကျွေးလို့မရဘူး၊ ဘာဖြစ်လို့လဲ ဆိုတော့ ငါတို့ရဲ့သားက အရမ်း ငယ်လွန်းသေးတယ်။ ခရမ်းချဉ်သီးဟင်း စားဘူးတယ်လို့ တယောက်ယောက်ကို ထုတ်ပြောလိုက်ရင် ငါ ဥယျာဉ်တော်ထဲက ခရမ်းချဉ်သီး ခိုးတယ်ဆိုပြီး အပြစ်ပေး ခံရလိမ့်မယ်" လို့ ပြောသည်။

သို့ပေမဲ့ သူ့ဇနီးက လက်မခံဘဲ သားငယ် ခရမ်းချဉ်သီးဟင်းကို မြည်းစမ်းခွင့် ရရေးအတွက် နည်းလမ်းရှာရန် ပြောခဲ့သည်။ တာနီရာမကလည်း သူ၏ သားကို ချစ်မြတ်နိုးသောကြောင့် စိတ်ကူးတခုကို စဉ်းစားမိပြီး လသာဆောင်ပေါ်သို့ တက်ခဲ့သည်။ လသာဆောင်တွင် အိပ်ပျော်နေသာ သားငယ်ကို ရေဖြင့် ဖြန်းနှိုးလိုက်ပြီး ကလေး မနိုးတနိုး ဖြစ်နေစဉ် သူက ကလေးငယ်အား "မိုးရွာ‌နေတယ် အိမ်ထဲဝင်ပြီး ညစာ စားကြရအောင်" ဟု ပြော၍ အိမ်ထဲ ပွေ့ချီလာခဲ့သည်။

ထို့နောက် သူသား၏ အဝတ်များကို လဲပေးပြီး ညစာအတွက် ထမင်းနှင့်ဟင်းကို ပေးခဲ့သည်။ တာနီရာမက ဇနီးဖြစ်သူကို အပြင်မှာ မိုးတွေ ရွာနေတယ်၊ သားလေးအတွက် နွားနို့ပူပူလေး လုပ်ပေးပါသည် ဟု ကလေးငယ် ကြားအောင် ပြောခဲ့သည်။ သူ့ဇနီးကလည်း နွားနို့တိုက်ခဲ့သည်။

နောက်တနေ့တွင် ဥယျာဉ်မှူးသည် ဟင်းသီးဟင်းရွက်နှင့် ပန်းများကို ရေတွက်ပြီးသောအခါ ခရမ်းချဉ်သီး သုံးလုံး ပျောက်နေကြောင်း တွေ့ရှိသဖြင့် ဧကရာဇ်အား လျှောက်တင်ခဲ့သည်။ ဒါ့ကြောင့် ဧကရာဇ်ဟာ အလွန် စိတ်ဆိုး ဒေါသထွက်ခဲ့ပြီး သူခိုး ဖမ်းပေးနိုင်သူအား ဆုငွေအသပြာ တထောင် ပေးမည်ဟု ကြေငြာခဲ့သည်။

အမတ်ချုပ်ကြီးက တာနီရာမကို သံသယ ရှိသည်။ ထိုအကြောင်းကို ဧကရာဇ်အား လျှောက်ထားလိုက်သည်။ ဧကရာဇ်က နန်းတွင်းသား တဦးအား စေလွှတ်ပြီး တာနီရာမကို နန်တွင်းသို့ ချက်ချင်းလာခိုင်းခဲ့သည်။ တာနီရာမ ရောက်လာတာနဲ့ ခရမ်းချဉ်သီးတွေ ခိုးတယ်မလား ဟု မေးမြန်းခဲ့သည်။ သို့သော် တာနီရာမက ခရမ်းချဉ်သီးများအား လုံးဝ မခိုးကြောင်း ပြောကြားခဲ့သည်။

ထိုအခါ အမတ်ချုပ်ကြီးက "တာနီရာမက လိမ်တတ်တယ်။ သူ့ရဲ့သားကို မေးမြန်းခွင့်ပြုပါ" ဟု လျှောက်ထားတော့ ဧကရာဇ်က ခွင့်ပြုခဲ့သည်။ ဧကရာဇ်က တာနီရာမရဲ့ သားကို ခေါ်ဖို နန်းတွင်းသားတဦး ထပ်မံ စေလွှတ်ခဲ့သည်။ သူ့သား ရောက်လာသည်နှင့် ပြီးခဲ့သည့် ညက ဘာဟင်းတွေ စားခဲ့ရလဲ ဟု မေးမြန်းခဲ့သည်။ ကလေးက "ညက အရမ်းကောင်းတဲ့ ခရမ်းချဉ်သီးဟင်း စားခဲ့ရပါတယ်" ဟု ဖြေကြားခဲ့သည်။

ထိုအခါ အမတ်ချုပ်ကြီးက တာနီရာမအား သူ၏ အပြစ်ကို ဝန်ခံရန် ပြောကြားခဲ့သည်။ သို့သော် တာနီရာမက "ကျွန်တော်၏ သားသည် မနေ့ညက အိမ်စာပြုလုပ်ပြီး ညစာပင် မစားဘဲ စောစောစီးစီး အိပ်ပျော် သွားခဲ့ပါတယ်၊ အိပ်မက် မက်ခဲ့သော အရာကို ပြောနေခြင်း ဖြစ်နိုင်ပါတယ်" ဟု ပြောကြားခဲ့သည်။ ထိုအခါ ဧကရာဇ်က ကလေးကို "မနေ့က ကျောင်းက ပြန်လာပြီး ဘာလုပ်ခဲ့တယ် ဆိုတာ ရှင်းရှင်းလင်းလင်းရှင်းပြစမ်း" ဟု‌ ပြောခဲ့သည်။

တာနီရာမ၏ သားက "မနေ့က ကျောင်းကနေ ပြန်လာပြီးတော့ သူငယ်ချင်းတွေနဲ့ ကစားတယ်။ ပြီးတော့ လသာဆောင်ပေါ် တက်သွားတယ်၊ အိမ်စာလုပ်တယ်၊ လသာဆောင်မှာ အိပ်ပျော်ခဲ့တယ်။ မိုးရွာတော့ အဖေက ကျွန်တော့်ကို လာနှိုးတယ်၊ ရေစိုနေတဲ့ အဝတ်အစားတွေကို အဖေက လဲပေးတယ်။ အဲဒီနောက် ကျွန်တော်တို့ အိမ်ထဲဝင် ညစာစားပြီး ပြန်အိပ်ခဲ့ကြတယ်" ဟု ပြန်ဖြေသည်။

နွေရာသီဖြစ်ပြီး မနေ့ညက မိုးမရွာသောကြောင့် အမတ်ချုပ်ကြီး အံ့အားသင့် သွားသည်။ ရာသီဥတုက ပူလောင် ခြောက်သွေ့နေသည်။ ဒီတော့ ကလေးက အိပ်မက်မက်ပြီး ယောင်ခဲ့တာ အမှန်ဖြစ်မည်၊ တာနီရာမကို အပြစ်ပေးရန်မလို ဟု ဆုံးဖြတ်ခဲ့ကြသည်။ သို့ရာတွင်နောက်ပိုင်းတွင် တီနာရာမသည် အမှန်တရားကို ဧကရာဇ်အား လျှောက်တင်ခဲ့ပြီး သူ၏ လိမ္မာ ပါးနပ်မှုကြောင့် ဧကရာဇ်က ခွင့်လွှတ်ပေးခဲ့သည်။

Crd

Post a Comment

0 Comments